Jesaja 12 - O Debleskro Drom 2021 (Sinte)

I sharepaskri gili

¹ I diwes wella, kai i menshe an Jerusalem giwenna: Me sharau tut, baro Dewel! Awa, tu hals chojedo ap mande. Kanna hal buder gar chojedo un rakreh latches mantsa.

² O Dewel lell man dran i bibacht win. Me rikrau ap leste, un darau gar. Peskri sorjah was o baro Dewel ap miri rig. Miri giljah sharau les dran o dji. Job las man win.

³ Ap ko tsiro, kai lell tumen o Dewel win, wenn tumer jaake bachtelo har trushele menshe bachtelo hi, te hatsenn le pani.

⁴ Un ap ko tsiro denn tumer gole: Parkrenn tumen pash o baro Debleste! Denn ap leste gole, te well lo ap tumari rig! Penenn i menshenge an i tsele themma, hoi lo kras. Penenn hakeneske te hi leskro lab bareder har hako wawar lab!

⁵ Giwenn gilja o baro Debleske! Railo koowa kras lo. Hakeno ap i phub te shunell lestar.

⁶ Giwenn un denn gole i bachtjatar, tumer, kai djiwenn an o foro Zion. O Israeleskro Dewel hi bares mashkral tumende.