Jesaja 11 - O Debleskro Drom 2021 (Sinte)

O baro rai, koles o Dewel bitchrell

¹ Jaake har well i tikno newo kasht dran i tele dino ruk, un i newo tikno ruk mank leskre draba win, jaake well i newo baro rai dran o Davideskro kheer.

² Un ap koleste well o ducho o baro Deblestar tchiddo, un dell les o goswepen, te haiwell lo bud koowa, un djinell, hoi te krell lo. Ko Debleskro ducho dell les ninna i soor koleske, un sikrell les, har o baro Dewel hi, un har te djiwell lo leha.

³ Leske hi shukar, te rikrell lo peske o baro Debles glan i jaka pash kowa, hoi lo krell. Job krell gar o tchatchepen win pal kowa, hoi glan leskre jaka hi un leske penlo was.

⁴ Na-a, job dell i tchorwelende pengro tchatchepen, un well kolenge ap i rig, kai gar an-dikle hi, te lenn jon pengro tchatchepen. Penell lo i sorelo lab, palle lenn i marepangre pengri phagi. Les hi i soor, te penell ap o tchilatcheste: “Tu hunte meress!”

⁵ Hako tsiro krell lo o tchatchepen. Hako tsiro penell lo, hoi tchatcho hi. Doleske hi o tchatchepen trul leste har i pereskri dori trul i ripen.

⁶ An ko tsiro djiwenn i diwje djukle khetne i tikne bakrentsa. Un i bare diwje margodje tchiwenn pen tele pash i tikne busja. Terne grumja un terne lewe wenn khetnes baro. Un i tikno tchawo dell jak ap lende.

⁷ I grumja un i bere chan khetne. Un lengre tchawe hi khetne tchiddo. Un o lewo chala khass har i grumja.

⁸ Un i tikno tchawo khelell pes kote, kai i tchilatcho sap khere hi, un taprell peskro wasteha tel o bar, kai ko sap hi. Un o sap dandrell les gar.

⁹ Ap o Debleskri berga Zion krell buder kek tchilatcho koowa, witar gar dukrell jek i wawares. Jaake har o baro pani pherdo pani hi, jaake well i tseli phub pherde menshe, kai prindjrenn o baro Debles.

¹⁰ Ap ko diwes well i mursh dran o Davideskro kheer, har i tikno ruk dran i draba i tele-dino rukestar, un well i sikepen i tsele menshenge ap i phub. Menshe dran wawar themma putchenn pal leste. Un leskro foro, kai job djiwell, well pherdo railepen.

¹¹ Un ap ko diwes hadell o Dewel peskro wast i duito kopo, te ginell lo kolen win, kai peskre menshendar pral atchan an i themma Assur un Egiptia, Patros, Kush, Elam, Shinar, Hamat, un an kol panjeskre themma.

¹² Un job tchiwell i sikepen pre, te sikrell lo kol menshen an i wawar themma, te anell lo kolen khetne, kai dran Israel un Juda win tradedo his. Kolen anell lo pale dran hake rigja i phubjatar.

¹³ Palle silwerenn i menshe an Efrajim buder gar ap kolende an Juda. Un kolla dran Juda krenn kolenge dran Efrajim buder kek tchilatchepen.

¹⁴ Palle djan le khetne bari sorjah ap i Filistarja, kai kote djiwenn, kai o kham tele djal. Un khetne randenn le kolen win, kai an i themma djiwenn, kai o kham pre djal. I themma Edom un Moab lenn le dren. Un i Ammonarja hunte krenn, hoi jon penenn.

¹⁵ Un o baro Dewel mukell i kotar o baro panjestar pash o them Egiptia truk te well. Un leskro wast mukell i sorelo tato ducho pral o pani Eufrat te djal, te atchenn lestar kokres efta tikne panja pral, hoi nashenn, jaake te nai djan le pengre kirchentsa koi wergel.

¹⁶ Un palle dell i drom dran o them Assur win kolenge, kai leskre menshendar Israel kote djides atchan, jaake har i drom das peskre menshenge ap ko diwes, har djan jon dran o them Egiptia win.