Jeremia 47 - O Debleskro Drom 2021 (Sinte)

Laba pral i Filistarende

¹ Glan ko tsiro, kai o Farao ko foro Gaza khetne das, rakras o baro Dewel ap peskro rakepaskro, o Jeremia, pral i Filistarende.

² Kawa penell o baro Dewel: Dik, panja wenna koi rigjatar, kai norden hi. Un kolla wenna i diwjo sorelo lengsto pani, hoi tchakrell kau tselo them tel peste, un halauter hoi koi dren hi, i forja un kol menshen, kai kote djiwenna. Un i menshe an kau them denn gole un rowenna.

³ Jon shunenn, har i herja kol sorele grajendar kote pre stakrenna, un koi bari gole, hoi i rade lengre kurepangre wurdjendar krenn. Koi lenn le jaake daar, te dikenn pen i dada gar trujel pal pengre tchawende.

⁴ Ko diwes was, kai nashrenn i tsele Filistarja pengro djipen. Kek atchell djido, kai nai wals kol forjenge Tirus un Sidon ap i rig. O baro Dewel marell kol Filistarjen, kolla kai atchan kolendar pral, kai wan dran ko panjeskro them Kreta.

⁵ Pral o foro Gaza well o ropen, un o foro Ashkelon well khetne dino. Tumer, kai atchan pral o menshendar Anak, har rah kamenn tumen an o mass te tchinell?

⁶ Tu, o baro Debleskro charo, kaana kameh tu pre te herell? Muk tele un dja pale an tiri possita, un atch pokones!

⁷ Har nai mukell o charo tele? O baro Dewel hi kowa, kai penas leske, te well lo pral o foro Ashkelon, un kai bitchras les pash kolende, kai djiwenn pash o baro pani.