Jeremia 43 - O Debleskro Drom 2021 (Sinte)

O Jeremia well an o them Egiptia anlo

¹ Har o Jeremia i tsele menshenge halauter penas, hoi lengro baro Dewel leske penas, te penell lo lenge,

² rakran pre-phurde mursha leha – mank lende his o Asarja, koleskro dad o Hoshaja his, un o Johanan, koleskro dad o Kareach his – un penan ap leste: Tu chocheh! Maro baro Dewel bitchras tut gar pash mende, te peness menge: “Ma djan an o them Egiptia, un ma djiwenn kote!”

³ O Baruch, koleskro dad o Nerija hi, kowa rakras an tute dren, te penal sawo koowa. Job kamell, te peras an o wast i lurdendar dran Babilonia, te marenn le men oder te anenn men pandles an o them Babilonia.

⁴ Un o Johanan, un i tsele pralstune lurde, un i tsele wawar menshe dran o them Juda shunan gar ap kowa, hoi o baro Dewel lenge penas, te atchenn le an o them Juda.

⁵ O Johanan un i tsele pralstune lurde lan halauteren khetne pash pende, kai pral atchan dran o them Juda, un kolla kai nashan penge an wawar themma, un palle khere wan, te djiwenn le an o them Juda.

⁶ Kolla his mursha, djuwja un tchawe. Mank lende his ninna o baro rajeskre tcha, un kol wawar halauter, kai mukas o Nebusaradan pale pash o Gedalja, koleskro dad o Ahikam his, koleskro dad o Shafan his. O Nebusaradan his o pralstuno lurdo, kolendar kai dan jak ap o Nebukadnezar. Mank kolende, kai khetne lino wan, his ninna o Debleskro rakepaskro, o Jeremia un o Baruch, koleskro dad o Nerija his.

⁷ Un jon djan an o them Egiptia. Un jaake shunan le gar ap kowa, hoi o baro Dewel lenge penas. Un jon wan an o foro Tachpanes.

O Jeremia dikell glan-wi, kai well o Nebukadnezar peskre lurdentsa an o them Egiptia dren

⁸ Un kote an o foro Tachpanes, penas o baro Dewel ap o Jeremia:

⁹ Le bare barra un tchip len an i phub pash o wudar, kai djal an o Faraeskro kheer an o foro Tachpanes! Kre kowa jaake, te dikenn i mursha dran o them Juda, hoi tu kreh!

¹⁰ Un pen ap lende: Kawa penell o baro Dewel, ko rai pral o bolepen un i phub, kai o Israeleskro Dewel hi: Shunenn, me dau o Nebukadnezares kate gole. Job, ko baro rai dran o them Babilonia, krell miri budi. Pral ap kal barra, hoi mukom an i phub te tchiwell, mukau leskro shukar plachteno kheer pre te tchiwell, kai lo beshdo hi un sikrell, kai job o baro rai hi.

¹¹ Job peskre lurdentsa well dren an o them Egiptia un well o sorleder. Palle merenn bud menshen, wawar wenn pandles lino, un wawar o chareha maredo. Hakeno well jaake tapedo har leske glan-wi diklo hi

¹² Un me mukau kol khera te chatchrell, hoi i Egiptarja pengre deblenge kran. Un lengre debla mukau pandles krik te anell. Un job krell o them Egiptia djudjo i chochene deblendar jaake har i bakrengro i djuwa win lell dran peskri plaashka. Un palle djal lo dureder un kek rikrell les pre.

¹³ Un job phagell i bare barra pash o foro Bet-Shemesh an kotja. Un i khera i deblentsa chatchrell lo tele an o them Egiptia.