Jeremia 28 - O Debleskro Drom 2021 (Sinte)

O Jeremia un o chocheno rakepaskro, o Hananja

¹ An kau emligo bersh an o pantchto tchon an o starto bersh, har o Zedekja o baro rai pral Juda his, rakras o rakepaskro, o Hananja, ap mande. Leskro dad his o Asur. O Hananja his i rakepaskro dran Gibeon, kai das glan, kai leskre laba o baro Deblestar wenna. Job rakras ap mande, har homs an o baro Debleskro kheer. Un i rashaja un kol wawar menshe, kai ninna koi his, shunan, har job mange penas:

² “Kowa penell o baro Dewel, ko rai pral o bolepen un i phub, kai o Israeleskro Dewel hi: Me phagom koi soor o baro rajestar dran Babilonia.

³ Glan dui bersha trujel hi, anau ko tselo kutch koowa pale pale, hoi an o baro Debleskro kheer his, un hoi o baro rai dran Babilonia, o Nebukadnezar, kotar krik las, un an o them Babilonia anas.

⁴ Ninna anau o baro rajes pral Juda pale an kau foro, o Jekonja, koleskro dad o Jojakim his, khetne kol tsele menshentsa, kai dran o them Juda an o them Babilonia pandles anlo wan. Awa, phagau i soor o baro rajestar dran Babilonia. Kowa penell o baro Dewel.”

⁵ Koi rakras o Debleskro rakepaskro, o Jeremia ap o rakepaskro, o Hananja. Un i rashaja un i tsele menshe, kai an o Debleskro kheer tardo hi, shunan, har lo penas:

⁶ “Amen! O baro Dewel te krell jaake! Mu krell job, te well tiro lab tchatcho, hoi glan-wi penal, te anell lo ko kutch koowa dran leskro kheer, hoi an o them Babilonia anlo was, pale pale an kau foro, ninna kol tsele menshen, kai pandles krik anlo wan.

⁷ Kanna shun, hoi tuke penau un kal tsele menshenge:

⁸ O Debleskre rakepangre, kai his glan mande un glan tute, kolla rakran glan i rah tsiro pral kurepen, bok un nasslepen, hoi well pral sorele themma un bud menshende.

⁹ I rakepaskro, kai penell bacht glan-wi, kolestar djinenn le gar, hi lo bitchedo o baro Deblestar oder gar. Kowa well diklo, te well kowa tchatcho, hoi lo glan-wi penas.”

¹⁰ Koi las o rakepaskro, o Hananja, ko kasht tele, hoi his o Jeremijes trul i meen, un phagas les an kotja.

¹¹ Un o Hananja penas glan i tsele menshende, kai kote his: “Kowa penell o baro Dewel: Jaake phagau i soor o baro rajestar Nebukadnezar dran Babilonia khetne, glan dui bersha trujel hi, un lau i tsele themma dran leskre wasta win.” Un o Debleskro rakepaskro o Jeremia djas peske.

¹² Pal kowa, kai phagas o Hananja o kasht tele, hoi trul o Jeremijeskri meen his, penas o baro Dewel ap o Jeremia:

¹³ “Dja pash o Hananja un pen leske: Kowa penell o baro Dewel: Tu phagal i kasht. Kanna well i saster kote, kai o kasht his.

¹⁴ O baro Dewel, ko rai pral o bolepen un i phub, kai o Israeleskro Dewel hi, kowa penell: Me krau, te hunte budrenn i menshe an kal tsele themma o baro rajeske dran Babilonia, o Nebukadnezar. Leskro wast hi phares ap lende tchiddo har i saster, hoi o hacho trul o gurumeskri meen tchiwell. Ninna i viechen tchiwom an leskro wast.”

¹⁵ Un o Jeremia penas ap o Hananja: “Shun, Hananja! O baro Dewel bitchras tut gar. Tu kral, te patsenn kal menshe chochepen.

¹⁶ Doleske penell o baro Dewel: Tiro rakepah anal i menshen o Debleskro dromestar krik. Doleske lau tut krik i phubjatar. Kau bersh mereh tu.”

¹⁷ Un o Hananja meras an kau emligo bersh an o eftato tchon.