Jeremia 20 - O Debleskro Drom 2021 (Sinte)

¹ Ko rashai Pashur, koleskro dad o Immer his, his o pralstuno an o baro Debleskro kheer. Har job shunas, hoi o Jeremia rakrell,

² das lo les, un pandas leskre herja an i kotar kasht pash o wudar, hoi kharell Benjamineskro Wudar, un hi pash o baro Debleskro kheer.

³ Un ap o wawar diwes mukas o Pashur o Jeremijes dran o kasht win. Koi penas o Jeremia ap leste: O baro Dewel dell tut gar buder Pashur gole. Tu khareh kanna ‘Traash ap hakeneste’.

⁴ Kowa penell o baro Dewel: Tu aneh traash ap tute un ap tire malende. Jon wenn maredo o chareha kolendar, kai kurenn pen lentsa. Un tu dikess kowa tire jakentsa. Un me kamau i tsele menshen an o them Juda an o wast o baro rajestar dran o them Babilonia te dell. Kowa anell i kotar lendar pandles an Babilonia un dell i wawaren mulo o chareha.

⁵ Ko tselo brawlepen an kau foro dau me kolen, kai len win randenn. I tsele lowe, hoi i menshe an Jerusalem dran pengri budi khetne anan un lengro kutch koowa un o tsele brawlepen kol rajendar pral o them Juda lenn le pentsa un anenn les an o them Babilonia.

⁶ Un tu, Pashur, weh tapedo khetne kolentsa, kai pash tute an o kheer hi, un pandles an Babilonia anlo. Kote hunte meress un weh paskedo tire tsele malentsa, kai ginal lenge chochepen dren.

O Jeremia dell gole ap o baro Debleste

⁷ Baro Dewel, tu rakral jaake rah ap mande dren bis te krom, hoi tu kamal. Tu hal sorleder har me. Kanna wom lenge sapaske, un hakeno sal man win.

⁸ Hako kopo, te rakrau, hoi tu mange penal, hunte dap gole: Marepen un dukepen! Doleske san le pral mande hako diwes un taprenn pen ap o shero.

⁹ Awa, te penau mange, me kamau o Debles te bistrell, un rakrau buder gar an leskro lab, palle chatchell leskro lab an mande har i jag. Me lau miri tseli soor khetne, te rikrap kowa win. Un kowa djal gar.

¹⁰ Me shunau, har bud menshe tchorchanes rakrenna: “Job krell menge tchi har traash. Anas doosh ap leste! Sikras les an!” Ninna mire mala lurenn koi pre, te perap. “Dikas, te anas les jaake dur, te penell job tchomone, hoi gar mishto hi. Palle dah les pale, hoi lo mentsa kras!”

¹¹ O baro Dewel hi pash mande un dell ap mande garda har i sorelo mursh. Doleske perenn kolla, kai man palla lenn un hunte tserdenn pen pale. Kowa, hoi len glan hi, nai krenn jon gar. Un wawar san pral lende. Hako tsiro hi kowa lenge i ladj un well lenge gar bistedo.

¹² Baro Dewel, tu rai pral o bolepen un i phub, tu prindjreh lauteren, kai ap tute rikrenn. Tu dikeh, hoi an lende hi, prindjreh lengre djia. Muk man te dikell, har tu kolen i phagi deh, kai man palla lan. Me dom miro koowa an tire wasta.

¹³ Giwenn o baro Debleske! Sharenn les, job lell o tchorweles dran i wasta i tchilatchendar.

O Jeremia hi bibachtelo

¹⁴ Bibacht ap ko diwes, kai wom boldo! Kek te penell, kai anas ko diwes bacht, kai miri dai man ap i phub anas.

¹⁵ Bibacht ap ko mursheste, kai kras miro dades bachtelo, har penas lo leske: Tuke was i mursh tchawo boldo.

¹⁶ Ko diwes te well har kol forja, kai o baro Dewel paash kras, un kolla les gar khaitan. Taissarlake mu shunell lo ropen un mashkral o diweske o kurepaskri gole.

¹⁷ Doleske kai mukas job man gar te merell an miri dakro per, jaake te wals miri dakro per har i mulengro kheer mange, un joi atchals hako tsiro an wawar koowa.

¹⁸ Hoske wom dran miro dakro per win, te dikap ropen un duka, un djiwap hako diwes an ladj?