Jakobo 3 - O Debleskro Drom 2021 (Sinte)

I tchip

¹ Mire phrala, hi gar mishto, te wenn bud tumendar sikepangre. Tumer djinenna, kai o Dewel rakrell o tchatchepen pral i menshende win. Ap ko tsiro dikell lo ap kol sikepangren budeder har ap kol wawarende.

² Mer halauter krah bud kope, hoi gar mishto hi. Koon rakrell an kek tsiro tchilatcho koowa, kowa hi i latcho mensho, kai nai rikrell pes khetne.

³ Dikenn ap i graja! Te tchiwah mer lenge ko kotar saster an o mui, jaake nai anah mer len kote, kai mer kamah.

⁴ Dikenn ninna ap kol bare shiffe, kolen i sorelo ducho pral o baro pani tradell. Lengro rai anell len o tikno kashteha kote, kai job kamella.

⁵ Jaake hi ninna mari tchip tikno un krell nai bare laba. Tumer djinenna, i tikni jag nai chatchrell i tselo weesh tele.

⁶ I tchip hi har i jag. Lat hi i soor, te krell li bud tchilatcho koowa. I tchip nai krell o tselo menshes djungeles un tchilatches. Koi jag, hoi i tchip krell, chatchrell o tselo djipen, un well o bengestar.

⁷ I menshe hi i raja pral i tsele diwje viechende, ninna pral i tchirkle, pral i bare sapa un pral i bare matche. Un kolla hunte krenn, hoi i menshe kamenna.

⁸ Kek mensho hi o rai pral peskri tchip. I tchip hi diwjo un tchilatcho. I tchip hi har i midjak sap, hoi anell o merepen.

⁹ I tchipjah sharah mer o Debles, kai hi maro rai un dad. Un i tchipjah praassah mer i menshen, kai o Dewel kras jaake har job hi.

¹⁰ Dran ko emligo mui wella sharepen un praassepen. Kowa hi gar mishto, mire phrala!

¹¹ Dran jek pani nai well gar jek kopo latcho pani un o wawar kopo londo pani.

¹² Mire phrala, i ruk, hoi hidjrella phabja, nai hidjrell kek brola. I ruk, kai hidjrell drake, nai hidjrell kek kirjasse. Jaake nai well kek londo pani dran o latcho pani win.

O goswepen, hoi wella o Deblestar

¹³ Koon gosewo hi mank tumende un djinell bud, kowa hunte sikrell dran peskro latcho djipen, kai haiwas lo, hoi mishto un tchatcho hi. Un job sharell pes gar pral ko latcho koowa, hoi job kras.

¹⁴ Te silwerenn tumer un hadenn tumen pre pral i wawarende, ma penenn, kai han gosewo! Kowa wals i chochepen un gar o tchatchepen.

¹⁵ Sawo goswepen well gar o Deblestar. Kowa well o menshestar un o bengestar.

¹⁶ Kote, kai i menshe silwerenna, un hadenn pen pre pral i wawarende, kote hi tchingepen un hako tchilatcho koowa.

¹⁷ Ko goswepen, hoi o Deblestar wella, hi wawartchandes. I mensho, kai hi les kau goswepen, kowa djiwell i djudjo djipen. Job kamell te djiwell lo latches i wawarentsa khetne. Job hi kamlo un latcho. Les hi i dji i wawarenge, un krell bud latcho koowa. Job mukell pes gar ap jekeskri rig te tserdell. Les hi gar dui tchipja.

¹⁸ Kolla, kai lenn o tchingepen mank i menshende krik, kolendar well latcho koowa, kai atchell hako tsiro.