Hiob 7 - O Debleskro Drom 2021 (Sinte)

¹ I menshe hunte budrenn phares ap kai phub. Pengro tselo djipen marenn le pen tele har i budepangre, kai wenn haki rati plaissedo.

² Jaake har i budepaskro, kai kamell, te well rati, kai well lo dran o kham, un kai well lo plaissedo,

³ jaake wan mange i tsele tchonna, kai djiwom tchitcheske, un bud ratsja pherdo daar un duk.

⁴ Te tchiwom man tele, penau me: Kaana nai stau pale pre? I rat kamell gar pre te herell, un me rissrau man jek rigjatar ap i wawar, bis te well o diwes.

⁵ Miro mass ap mande hi tchakedo kirmentsa un tchik. Miri hauta phagell pre, un djelto pani nashell win.

⁶ Mire diwessa djan trujel jaake sik har i sub, hoi pre un tele djal. Un kowa hoi gomme glan mande hi, nai well tchi, hoi shukar hi.

⁷ Ma biste, miro Dewel, te hi miro djipen har i ducho. Mire jaka dikenn buder kek bacht.

⁸ Tu, kai leh man kanna an o jak, nai dikeh man palle buder gar. Te rodeh pal mande, hom me buder gar koi.

⁹ Jaake har i wolka ap jek kopo buder gar koi hi, jaake hi o mensho, kai merell. Job well buder gar pale dran o mulengro them.

¹⁰ Pash peskro kheer well lo gar buder pale Un kote, kai djiwas lo, well lo bistedo.

¹¹ Doleske kamau me ninna gar miro mui te rikrell, kamau te rakrap dran miro djijeskri daar, un miri bari duk win gole te dell.

¹² Hom me o baro pani oder i baro panjeskro viecho, te dess tu jaake jak ap mande, te krap tchi?

¹³ Te penau: Ap miro tchiben djal mange feteder, an miro sopen well miri duk tikneder,

¹⁴ palle bitchreh tu mange djungele sunja, hoi krenn man daar un traash.

¹⁵ Mange wals feteder, te tassrals man jek. O merepen hi latcheder har sau djipen.

¹⁶ Me kamau gar buder, kamau gar buder te djiwell. Muk tele mandar! Miro djipen hi sik trujel.

¹⁷ Hoi hi o mensho, te dikess tu ap leste, har te well lo komone baro? Hoske rissreh tu tiro tselo dji pash leste?

¹⁸ Haki tsalla dikeh ap leste, un mukeh les gar i tikno tsireske dran tiro jak, te dikess palla, har un hoske job kowa kras, hoi lo kras?

¹⁹ Hoske dikeh gar krik mandar i tikno tsireske, jaake rah har me pijau miri tchunger an miro mui tele?

²⁰ Tu hal kowa, kai lell i menshen an o jak. Lom me doosh ap mande? Te wals kowa jaake, hoi krom me koleha tuke? Hoske hom me kowa, ap koleste karje deh? Hom me tuke i pharepen, hoi hunte hidjress?

²¹ Hoske leh tu ko tchilatchepen gar krik mandar, hoi krom, un bistreh miri doosh? An i tikno tsiro wau tel i phub. Te rodeh pal mande, hom me gar buder koi.