Hiob 42 - O Debleskro Drom 2021 (Sinte)

¹ Un o Hiob penas koi pre ap o baro Debleste:

² Me haiwom kanna, te nai kreh tu halauter. Un halauter, hoi kameh te krell, kowa kreh tu ninna.

³ Tu putchal: “Koon hal tu, kai putcheh dineles: Hi kowa gosewo, hoi o Dewel krell?” Awa, tut hi tchatcho: Rakrom, hoi dinelo his, un hoi gar haiwom un kolestar tchi djinom.

⁴ Shun, penal tu, me putchau tutar. Un tu peneh mange, hoi kamau te djinell.

⁵ Ap ko tsiro djinom tchi tutar, har kowa hoi mange penlo was. Kanna dikom tut mire jakentsa.

⁶ Doleske lau pale, hoi rakrom un hom beshdo an i tchik un an i jagakri tchik, te sikrap, kai khaitell man kowa, hoi rakrom.

O Dewel tchiwell pes o Hiobeske ap i rig

⁷ Un har o baro Dewel kol laba rakras o Hiobeha, penas job ap o Elifas dran Teman: “Kowa hoi o Hiob, koles miro tchatcho wast hi, pral mande rakras, hi tchatcho. Kowa, hoi tu un tire dui mala mandar rakran, hi gar tchatcho. Doleske hom chojedo ap tumende.

⁸ Kanna lenn efta terne gurma un efta bakre un djan pash o Hiob, un marenn kol viechen kote, un chatchrenn len mange! Un o Hiob, koles miro tchatcho wast hi, hunte mangell man tumenge. Ap koleste shunau un krau tumentsa gar, har hunte kroms. Tumer rakran gar o tchatchepen pral mande har job kras.”

⁹ Kote djas o Elifas peskre dui malentsa, o Bildad dran Shuach un o Zofar dran Naama, pash o Hiob, un jon kran, hoi o baro Dewel lenge penas. Un o baro Dewel shunas ap kowa, hoi o Hiob lestar mangas.

O baro Dewel tchiwell pale peskri bacht ap o Hiob

¹⁰ Un har o Hiob peskre malenge mangas, las o baro Dewel koi bibacht o Hiobestar krik, un kras les pale brawelo, un das les dui kope jaake bud, har les his.

¹¹ Un leskre tsele phrala un phenja un kolla, kai les glan ko tsiro prindjran, wan pash leste, un chan khetne leha, un rakran latches leha, un penan har koi bibacht lenge dukas, hoi mukas o baro Dewel pral leste te well. Un hakeno das les i sonakaskri bema un i gustri.

¹² Un o baro Dewel tchiwas budeder bacht ap o Hiob har glan kowa. Un job las 14.000 (deesh-te-star-serja) bakre un 6.000 (shob-serja) khamele un 2.000 (dui serja) grumja un 1.000 (jek sero) burike.

¹³ Un leske wan efta mursh tchawe boldo un triin tcha.

¹⁴ Un i phureder tchat das lo o lab Jemima un i duiti tchat o lab Kezia un i triinti tchat o lab Keren-Happuch.

¹⁵ Un an o tselo them his kek djuwja jaake shukar har o Hiobeskre tcha. Un lengro dad das len ninna dran leskro brawlepen jaake har lengre phralen, te lenn le kowa pal leskro merepen.

¹⁶ Un o Hiob djiwas pal kowa gomme 140 (sheel-te-star-deesh) bersha. Un job dikas peskre tchawen un tchawengre tchawen, un kolengre tchawen un kolengre tchawen.

¹⁷ Un job meras pal i lengsto djipen.