Hiob 28 - O Debleskro Drom 2021 (Sinte)

¹ Tel i phub nai hatsenn le rup. Un o sonakai, les hi i platsa, kai thowenn le les win.

² Dur dran i phub lenn le saster win, un lolo saster dran i barra, hoi wenn tato kerdo, te well o lolo saster win.

³ O mensho lell i momeli peha, te nai budrell lo tel i phub, un rodell kote an i barra, jaake dur har djala, pal kowa, hoi khatedo hi an o tamlepen.

⁴ Dur krik fun kotar, kai menshe djiwenn, krenn le i gruba, hoi djal dur tele, kote kai kek mensho ap i raisa djal. Un pandenn pen ap i shello, un mukenn pen tele an koi gruba, dur krik i wawar menshendar.

⁵ Pral ap i phub well djob baro. Un tella an i phub rissrenn le lauter trujel, jaake te dikell kowa win har pal i jag.

⁶ An kol bare barra an i phub hatsenn le kutch blauete barra, un an i tchik sonakai.

⁷ Kek adlari prindjrell o drom pash kol barra, un kek tchirklo, koles i feteder jaka hi.

⁸ Kek lewo un kek wawar diwjo viecho djas ap ko drom, hoi kote djal.

⁹ O mensho phagell an kol bare sorele barra, un rissrell i tsele berge trujel.

¹⁰ Dren an kol barrengre berge krell lo dromma, un hatsell kote bud kutch koowa.

¹¹ Job dikell kol tikne panja, hoi wenn dran i phub, un wenn lengste panja. Un ko kutch koowa an i phub, hoi kek dikas, lell lo win, un anell les kote, kai well lo diklo.

¹² Koon nai penell mange, kai nai well o goswepen hatslo? Kai nai hatsah win, har te djiwas i gosewo djipen?

¹³ Kek mensho djinell, har bud o goswepen moldo hi. Ap i phub, kai i menshe djiwenn, well lo gar hatslo.

¹⁴ O telstunepen penell: An mande hi lo gar! Un o baro pani penell: Pash mande hi lo witar gar.

¹⁵ I menshe nai ginenn gar o goswepen, nai denn kek rup witar kek sonakai, te plaissrenn le leske.

¹⁶ O goswepen hi budeder moldo har o latcheder sonakai un kutch blauete barra.

¹⁷ O sonakai un kutch glaso hi gar jaake kutch har o goswepen. Witar kek shukar sonakangre tchare nai dell jek, te lell lo o goswepen.

¹⁸ Koralle un kristallo hi gar doha moldo, te ginell jek lentsa o goswepen. Kones goswepen hi, hi brawleder har kones kutch mirklia hi.

¹⁹ Ninna ko kutch djelto bar dran o them Etiopia un ko latcheder sonakai hi gar jaake bud moldo har o goswepen.

²⁰ O goswepen, fun kai well lo? Un kai nai hatsah mer win, har te djiwas i gosewo djipen?

²¹ Khatedo hi lo glan i jaka halauterendar, kai djiwenn. Ninna i tchirkle an o bolepen nai dikenn les gar.

²² Un an o mulengro them well penlo: Mer shunam mare kandentsa, har was pral leste rakedo.

²³ O Dewel kokres hi kowa, kai djinell o drom, hoi anell pash o goswepen. Un job kokres djinell, kai o goswepen khere hi.

²⁴ Job hi kowa, kai dikell ap i tseli phub, jaake dur har djal li, un lauter, hoi ap late hi.

²⁵ Har job o ducho peskri soor das, har lo penas, bis kai ko baro pani nai djal,

²⁶ har job o brishin peskre tsirja das, un o bolepaskri jag peskro drom sikras,

²⁷ koi dikas lo, har bud moldo o goswepen hi. Job las les an i jak un penas: O goswepen hi latcho!

²⁸ Job penas ap o mensheste: Sawo mensho hi gosewo, kai rikrell pes o Debles glan i jaka pash kowa, hoi lo krell. Sawo mensho haiwas, har te djiwell lo o gosewo djipen, kai rikrell pes pale o tchilatchepastar.