Hiob 26 - O Debleskro Drom 2021 (Sinte)

O Hiobeskro ochtato rakepen

¹ Un o Hiob penas koi pre:

² Patseh, kau rakepah wal ap i rig mange, i mursheske, koles kek soor buder hi, un kai nai rikrell pes buder gar ap i herja?

³ Har shukar penal mange, hoi te krap, mange, i mursheske, koles kek goswepen hi! Un sikral mange bud koowa, hoi hunte djinap un haiwap!

⁴ Koon penas tuke, te rakress jaake? Koon tchiwas tuke kal laba an o mui?

⁵ An o mulengro them, an i panja tel i phub trissenn i mule i darjatar.

⁶ O mulengro them hi pre tchakedo tchiddo glan o Debleste. Tchi khatrell les glan leskre jaka.

⁷ O Dewel kras o bolepen buchles pral kowa, kai tchi hi, un pandas i phub kote pre, kai tchi hi.

⁸ Job pandell o brishin dren an i wolke, un kolla djan gar paash, fothe pharo o pani ninna hi.

⁹ Job khatrell peskri beshepaskri pal pesse wolke.

¹⁰ Job tchiwas i bogo pral o baro pani jek rigjatar ap i wawar, te well o diwes un i rati gar khetne.

¹¹ Te dell o Dewel kol bergen trad, hoi hidjrenn o bolepen, trissenn le i darjatar.

¹² Peskri sorjah kras lo o baro pani, te well lo diwjo, un job haiwas, har nai das lo o Rahab mulo.

¹³ Job phurdas i wolke krik, un o bolepen was shukar. Un leskro wast das ko sik panjeskro sap mules tchurje.

¹⁴ Dik, kawa hi tchi har i tikno kotar kolestar, hoi job kras. Un hoi lestar shunam, hi gar budeder har i tikno lab. Kek nai haiwell, har baro leskri soor tchatchepah hi!