Hiob 23 - O Debleskro Drom 2021 (Sinte)

O Hiobeskro eftato rakepen

¹ Un o Hiob penas koi pre:

² Ninna kau diwes rakrau me dran i dukedo dji. O Debleskro wast hi phares ap mande tchiddo, te hunte lap phares ducho.

³ Kamoms te djinap, har nai hatsau les, un har nai wau kote, kai lo o tchatchepen win rakrell!

⁴ Palle anoms miro koowa glan leste, un penoms leske kowa lauter, hoi nai rakrell mange mishto.

⁵ Kamoms te djinap, hoi job koi pre penell, un te shunap, hoi les hi mange te penell.

⁶ Tchingrals lo mantsa an peskri bari soor? Na-a, job shunals mishto ap mire laba.

⁷ Palle anoms miro tchingepen glan leste, un sikroms, te hom an o tchatchepen tardo. Un o Dewel, miro tchatchepaskro rai, dikals, te hi kek doosh ap mande, un mukals man te djal hako tsireske.

⁸ Te rodau me o Debles glan mande, hi lo gar koi, te rodau les pal mande, haiwau me lestar tchi.

⁹ Te djau serwes, dikau tchi, hoi job krell, te rissrau man ap i tchatchi rig, dikau les kote witar gar.

¹⁰ Job djinell hawo drom me djau. Dikals lo palla, har djiwau, hatsals lo win, te hom djudjo har sonakai.

¹¹ Me rikrom mire pire ap leskro drom, un atchom ap leste, un djom gar tele lestar.

¹² Me rikrom man ap hako lab, hoi was dran leskro mui. Un rikrom halauter an miro dji, hoi lo rakras.

¹³ Job atchell koon job hi. Koon nai anell les kolestar krik, hoi lo kamell te krell? Kowa, hoi kamell lo te krell, kowa krell lo.

¹⁴ Awa, job krell kowa dureder, hoi les mantsa glan his. Un les hi bud koowa mange an peskro dji.

¹⁵ Doleske taprell man i traash glan leste. Te well kowa mange an o shero, darau soreles lestar.

¹⁶ Awa, o Dewel kras miro dji darenes, o sorelo Dewel kras mange bari traash.

¹⁷ Hi gar i kali rat, witar gar ko tamlepen glan mande, te merap i darjatar. Na-a, darau o Deblestar.