Hiob 21 - O Debleskro Drom 2021 (Sinte)

O Hiobeskro shobto rakepen

¹ Koi pre penas o Hiob:

² Shunenn mishto, hoi penau! Te shunenn tumer man, palle djal mange feteder an miro dji.

³ Mangau tumen, mukenn man te rakrell! Pal kowa nai sanenn pral mande!

⁴ Tchatchepah, miro tchingepen hi gar i mensheha. Ninna te wals jaake, hoske te wap me gar chojedo?

⁵ Dikenn ap mande! Un tumer krenn bare jaka i trashatar, un tchiwenn tumaro wast glan o mui!

⁶ Te well mange an miro shero, har djungeles mange djal, taprell man i daar, un mukell man te trissell.

⁷ Hoske atchenn kol tchilatche djido wenn phuro, un lengri soor well bareder?

⁸ Lengre tchawe djiwenn trul lende trujel. Un jon dikenn, har lengre tchawengre tchawe baro wenn.

⁹ Jon djiwenn an latchepen an lengre khera kek darjah. Un o Dewel dell len kek phagi.

¹⁰ Lengre gurma stenn ap i grumja, un kolla lenn terne, kolendar kek merell.

¹¹ I tchilatche bitchrenn lengre tchawen win khelepaske. Un jon stenn trujel har tikne bakre.

¹² Un giwenn pash o bashepen ap i tikne pauke un dorjengre bashepangre, un khelenn bachteles pash o bashepen ap i tikne phurdepangre.

¹³ Kol tchilatchen hi i shukar djipen. Un kek dukentsa merenn le, un djan an o mulengro them.

¹⁴ I tchilatche penenn ap o Debleste: “Dja tuke mendar! Mer kamah tchi tire dromendar te djinell.

¹⁵ Koon hi o sorelo Dewel, te budras mer leske? Hoi hi kowa menge moldo, te mangas les an?”

¹⁶ Kal menshe penenn, te hi len pengri bacht an pengre wasta. Me patsau gar, te hi kowa tchatcho, hoi rakrenn jon penge dren.

¹⁷ Gar bud kope meras i tchilatcho, glan te was lo phuro. Gar bud kope was i bibacht pral leste. Gar bud kope anas o Dewel i phagi pral leste an peskri choli,

¹⁸ un phurdas les krik, har phurdell i ducho o phuss krik, un har hidjrell i sorelo phurdepen o tchik krik.

¹⁹ Tumer penenn, te anell o Dewel i phagi pral i tchawende ko tchilatchestar. Me penau: Job hunte dals koi phagi koleste, kai tchilatcho koowa kras, te haiwell job kowa,

²⁰ un dikell peskre jakentsa peskri bibacht, un haiwell kokres, har kowa hi, te well o sorelo Debleskri choli ap leste.

²¹ Hi lo mulo, hi leske jek, har djal leskre tchawenge.

²² Nai penell i mensho o Debleske, har tchomone hunte well – leske, kai hi o tchatchepaskro rai pral halauterende, ninna pral i pralstunende?

²³ Ko jek merell, te hi lo sasto un sorelo, un djiwell i shukar djipen kek darjah.

²⁴ Job hi thullo latcho chapastar, un leskre kokale hi sorelo.

²⁵ Ko wawar merell pal i pharo djipen un dikas kek bacht.

²⁶ Khetne hi le tel i phub, un i kirme tchakrenn len.

²⁷ Me haiwau, hawo koowa an tumare sherja trujel djal, un har kamenn man te dukrell.

²⁸ Tumer penenn: “Hoi was dran o kheer ko rajestar, kai jaake bud tchilatchepen kras?”

²⁹ Putchan tumer gar kolen, kai ap tumaro drom wan? Patsenn tumer gar, hoi jon dikan un shunan?

³⁰ Ap ko diwes, kai well i bibacht, kai well o Debleskri choli pral i menshende, atchell o tchilatcho djido.

³¹ Kek penell o tchilatcheske an o mui dren, hawo djungelo koowa job kras. Kek dell les ko tchilatchepen pale, hoi lo ap i wawarende kras.

³² Ap ko diwes, kai well lo ap o handako anlo, denn mursha jak ap leskri grufta.

³³ Te well lo kote anlo, djan bud bud menshe pal leste un glan leste. Un jaake har lo paskedo well, hi kowa leske shukar.

³⁴ Patsenn tumer, kai tumare laba krenn, te djal mange feteder an miro dji? Tumare laba hi tchi-moldo! Kowa, hoi mange penenn, hi tchi har chochepen!