Hiob 16 - O Debleskro Drom 2021 (Sinte)

O Hiobeskro starto rakepen

¹ Un o Hiob penas koi pre:

² Bud sau koowa shunom me. Tumare latche laba, hoi tumen mange hi, tumer halauter, krenn les mange gomme phareder!

³ Nai herenn tumer kanna pre kau dinelo rakepah! Elifas, hoi anell tut jaake pre te hunte rakress palpale?

⁴ Te wans tumer ap miri platsa, palle nai rakroms me jaake har tumer nai kroms bare laba pral tumende, un trissloms miro shero pral tumende.

⁵ Bud labentsa doms tumenge pale newi soor. Un kowa, hoi penoms, krals tumari duk tikneder.

⁶ Tchi, hoi penau, krell miri duk tikneder. un te rakrau gar, djal mange witar gar feteder.

⁷ Tchatchepah, o Dewel las mange miri soor krik. Tu, miro Dewel, lal mange miri tseli familja krik!

⁸ Un tu pandal man dren, har te kroms i tchilatcho koowa. Me hom tchi har hauta un kokale. Doleske patsenn i menshe, te lom doosh ap mande.

⁹ Leskri choli dandras man khetne un las man palla. Job sikrell peskre danda, un peskre jaka dikenn ap mande har te wans le tchurja.

¹⁰ Menshe wenn khetne trul mande, un dikenn ap mande pre-kerde mujentsa. Te well len tchomone sapaske denn le man tchamedinja.

¹¹ Miro Dewel das man o tchilatchenge an i wasta, kolenge, kai kamenn lestar tchi te djinell.

¹² Djiwom an o latchepen, har o Dewel das man khetne. Job tapras man ap miri meen, un witsras man tele. Job tchiwas man jaake pre, te dell lo ap mande karje.

¹³ Leskre faile djan haki rigjatar ap mande. Job dell man karje an mire buke dren. Un les khaitau gar. Miri galla tchorell lo win ap i phub.

¹⁴ Jek dap pal i wawar dell lo an mande dren. Har i kurepaskro nashell lo ap mande.

¹⁵ Me siwom mange i gono trul mande, un hom tchiddo kek sorjah an i tchik.

¹⁶ Miro tselo shero hi lolo miro bud ropah. Tel mire jaka hi kalepen.

¹⁷ Jaake hi kowa, ninna te krom kek tchilatchepen, un mangom miro Debles i djudjo djijeha an.

¹⁸ Me hom har i mursh, kai was maredo. I phub te khatrell gar miro rat, te well leskri gole hako tsiro shunlo.

¹⁹ Ninna kanna hi jek an o bolepen, kai stell mange pre un well ap miri rig. Kowa, kai mange mishto rakrell, hi an o pralstunepen.

²⁰ Mire mala sanenn pral mande. Mire jaka hi pherde swa, har dikau me pre pash miro Debleste.

²¹ Jaake har i mensho peskro maleske mishto rakrell, kamoms te rakrell jek mange mishto glan o Debleste.

²² Gar bud bersha hi gomme glan mande, un me djau ko drom, kolestar kek palpale well.