Hebrearja 5 - O Debleskro Drom 2021 (Sinte)

O Jesus kokres hi maro baro rashai

¹ Hako baro rashai hi dran i menshende win rodedo, te well lo lengro rashai glan o Debleste. Leske anenn le viechen, te anell lo len glan o Debleste, te well lengri doosh lendar krik lino.

² O baro rashai haiwell mishto, har kolenge djala, kai peran o Debleskro dromestar tele, ninna te djinan le gar, kai hi kowa tchilatcho, hoi jon kran. Job hi i mensho har jon, un les hi gar i soor pral o tchilatchepen.

³ Doleske hunte marell lo ninna peske i vieches, un anell les glan o Debleste, te well leskri doosh krik lino, jaake har job i wawar menshenge viechen marella, un glan o Debleste anella.

⁴ Kek mursh nai penella: Me wau baro rashai. Na-a, o Dewel rodell les win, jaake har job glan i rah tsiro ninna o Arones win rodas, te well lo i baro rashai.

⁵ Ninna o Jesus Kristo kras pes gar bares un penas: Me wau baro rashai. Na-a, o Dewel rodas les win, har penas lo ap leste: Tu hal miro tchawo. Kau diwes wom tiro dad.

⁶ I wawar kopo penas lo lestar: Hako tsiro hal tu o baro rashai glan mande, un kreh koi budi jaake, har glan i rah tsiro o Melchisedek kras.

⁷ Har o Jesus ap i phub djiwas, kras lo lauter, hoi o Dewel kamas. Doleske shunas les o Dewel. An i daar mangas o Jesus o Debles i ropah un bari goljah. Job djinas, kowa nai lell les dran o merepen win.

⁸ Ninna te his lo o Debleskro tchawo, hunte las job duka ap peste, te krell lo kowa, hoi o Dewel lestar kamas.

⁹ Un job kras kowa lauter, un tchi atchas pral, hoi hunte krals lo gomme. Jaake nai lell lo lauteren, kai ap leste shunenna, hako tsireske dran o tchilatchepen un o merepen win.

¹⁰ Un o Dewel penas ap leste: Tu hal i baro rashai glan mande, har glan i rah tsiro o Melchisedek his.

Djiwenn bud un budeder jaake, har o Dewel kamella!

¹¹ Pral kowa wals men tumenge budeder te penell. Un menge hi kowa phares, te rakras jaake, te haiwenn tumer les: Tumare djia wan khino.

¹² Tumer han jaake rah patslo, kai hunte wans sikepangre i wawar menshenge. Kowa han tumer gar. Tumende hunte well pale o Debleskro drom siklo har djinans les gomme gar. Jaake han tumer har tikne tchawe, kai pijenna thud, un nai chan kek mursheskro chapen.

¹³ I thud hi i tikne tchawenge, kai djinenn gar, hoi hi latcho un tchilatcho.

¹⁴ O mursheskro chapen hi kolenge, kai djiwenna pal o Debleskro lab un haiwenn bud un budeder, hoi latcho un tchilatcho hi.