Gosewe laba 9 - O Debleskro Drom 2021 (Sinte)

O goswepen un o dinlepen

¹ O goswepen hi har i djuwel, kai mukas efta bare pesse kashta te tchinell un pre te tchiwell, un peskro kheer ap lende te krell.

² Joi maras i grumjat, kras i mool mishto, un tchiwas tchare, khore, tchurja ap i chapaskri.

³ Palle bitchras li djuwjengre budepangre ap i pralstuni platsa an o foro, te denn le gole:

⁴ “Kones tchi an o shero hi, kowa well kate pash mande!” Ap o narweleste, penell li:

⁵ Ab, cha miro maro un pi i mool, hoi me krom!

⁶ Ma dja kolentsa, kolen tchi an o shero hi! Palle djiweh. Dja kolentsa, kai gosewe hi!

⁷ Te kameh i pre-phurdes tchomone pashel te anell, palle praassell lo tut. Te peneh i tchilatcheske, te kras lo, hoi gar mishto hi, palle dukell lo tut.

⁸ Te peneh i pre-phurdes, kai kowa, hoi lo kras, gar mishto hi, palle well lo chojedo ap tute. Te peneh i gosewes, kai kowa, hoi lo kras, gar mishto hi, palle kamell lo tut.

⁹ Pen i goseweske kowa, hoi job gar mishto kras! Palle well lo gomme gosweder. An koleske tchomone pashel, kai an o tchatchepen tardo hi! Palle djinell lo gomme budeder.

¹⁰ Glan halauter hunte djiwess o baro Debleha, te kameh gosewes te well. Te prindjreh koles, kai o tchatcho Dewel hi, hal tu tchatchepah gosewo.

¹¹ Me, o goswepen, dau tut i lengsto djipen, krau, te djiweh bud bersha.

¹² Te hal gosewo, hi kowa tuke bud moldo. Te hal pre-phurdo, hunte hidjress kokres, hoi kowa tuke anell.

¹³ O dinlepen hi har i narweli, bi-pandli djuwel, kolat tchi an o shero hi.

¹⁴ Glan o wudar peskro kherestar hi li beshdo, pral ap i platsa an o foro.

¹⁵ Un penell ap hakeneste, kai koi djal un ap o tchatcho drom hi:

¹⁶ “Koles tchi an o shero hi, kowa well pash mande!” Un ap koleste, kai narwelo hi, penell li:

¹⁷ “Tchoredo pani hi gudlo! Un maro, hoi chah khatedo, hi o latcheder!”

¹⁸ Un job djinell gar, te hi kote i mule. Kolla, kai pash late wenn, hi ap ko drom, kai an o merepen djal.