Gosewe laba 7 - O Debleskro Drom 2021 (Sinte)

¹ Miro tchawo, rike mire laba, un hoi tuke penom, khate an tiro dji!

² Rike mire laba un tu djiweh, de jak ap lende har ap tiro jak!

³ Pande len trul tiro gushto, tchin len an tiro dji!

⁴ Dik ap o goswepen, har te wals lo tiri pheen, un ap gosewo rakepen, har te wals lo tiro feteder maal.

⁵ Te hal gosewo, rikreh tut pale i wawareskri romjatar, awa, i wawar djuwjatar, kai shukar laba rakrell.

⁶ His i diwes, kai homs tardo pash i wali miro kherestar un dikom win.

⁷ Ap o drom dikom bud terne murshen, un mank lende jek, koles tchi an o shero hi.

⁸ Job djas ap o drom kote, kai i dromma khetne wenna pash i kheer, kai i djuwel djiwell.

⁹ His tamlo un i rati was.

¹⁰ Koi dikom lat, koi djuwel, rido an i ripen har i lubni. Joi djal pash leste un djinell mishto, hoi lat glan hi.

¹¹ Diwjo his li un bipandlo, te rikrell lat nai tchi an lakro kheer.

¹² Ap i dromma, ap i platse un kote, kai i dromma khetne wenna was li diklo, har rodell li pal jekeste.

¹³ Un joi taprell ko terno murshes, tchumrell les, dikell leske an i jaka un penell ap leste:

¹⁴ Kau diwes anom o Debleske i viecho, jaake har leske sowel dom. Ko mass hi khere pash mande.

¹⁵ Doleske djom win, te rodap tut, un kate hatsom tut!

¹⁶ Me tchiwom shukar plachte ap miro tchiben, sawe plachte, hoi wan kerdo dran kutch than, hoi dran Egiptia wella.

¹⁷ Lom kutch panja, hoi latches sungenna pal Myrrhe, Aloe un zimto, un tchorom len ap o tchiben.

¹⁸ Ab, te kamas men i tseli rat, te was mer dui bachtelo hakeno an i mussja o wawarestar.

¹⁹ Miro rom hi gar khere; job djas krik ap i dur drom.

²⁰ Leskri ladetsa bud lowentsa las lo peha, un well gar khere bis te o tchon pale pherdo hi.

²¹ Fothe joi ap leste dren rakras, kran kol bud laba les har mato, un lakro shukar rakepah tserdas li les peha.

²² Un job nashas lake palla, har i grumni, hoi gar djinell, te well li maredo, un jaake har i wesheskri busni, hoi stakrell an i dorja, hoi lat taprenn,

²³ kai i failo lake an o dji tchurje dell. Ko terno mursheske djal jaake har i tchirklo, hoi an i netsa djal, un gar djinell, te hunte merell lo.

²⁴ Doleske, mire tchawe, shunenn ap mire laba! Denn jak ap miro rakepen!

²⁵ Ma nashe tiro dji ap sawi djuwjate! Ma dja lake palla!

²⁶ Bud mursha kras li paash. Bud nashran dran late pengro djipen.

²⁷ Lakro kheer hi o wudar an o mulengro them. Koon pash late djal, hi ap o drom an o merepen.