Gosewe laba 5 - O Debleskro Drom 2021 (Sinte)

Ma dja pash i wawar djuwel!

¹ Miro tchawo, de jak ap kol gosewe laba, hoi tuke penau! Shun ap kowa, hoi tuke pashel anau.

² Palle haiweh hoi mishto hi, un tire laba sikrenn, kai hal gosewo.

³ O rakepen o wawareskri romni hi gudlo har gwin. Un lakre laba hi tuke shukar har latcho djet.

⁴ Pal kowa hi kowa, hoi tut latar hi, har i djungelo pipen un har i charo hoi ap dui rigja tchinell.

⁵ Joi tserdell tut peha an o merepen. Ko drom, kai li djal, anell an o mulengro them.

⁶ Joi djal gar ap o drom, kai anell o djipen. Lakro drom hi bango, un joi dikell kowa gar.

⁷ Doleske, mire tchawe, shunenn ap mande, un krenn, hoi tumenge penau!

⁸ Rike tiro drom dur krik latar! Ma dja pash o wudar lakro kherestar!

⁹ Te kreh tu kowa gar, nai well kowa jaake, te budreh i wawarenge, un deh tire feteder bersha kolende, kolen kek dji tuke hi.

¹⁰ Palle djiwenn wawar menshe tiro brawlepastar. Un kowa, hoi tu tuke jaake phares khetne lal, well an o wawareskro kheer.

¹¹ Palle leh tu phares ducho, pereh khetne,

¹² un peneh: “Har dinelo homs, har dom gar jak, hoi mange penlo was. Hoske shunom gar ap koleste, kai das man trad?

¹³ Hoske shunom gar ap mire sikepangre, un dom jak ap lengro rakepen?

¹⁴ Har sik nai woms an i bibacht! Un mire tsele menshe dikans kowa!”

Atch pash tiri romjate!

¹⁵ Pi dran tiri brunna! Tut hi latcho pani, hoi nashella. Pi kolestar!

¹⁶ Kameh, te nashell tiro pani win ap o drom un an o foro?

¹⁷ Tuke kokres hi lo, un kek wawareske.

¹⁸ Ap tiro pani hi o Debleskri bacht tchiddo. Ab bachtelo pral tiri romjate, kolat romedineral, har terno hals.

¹⁹ I kamli wesheskri grumni hi li, i shukar diwji busni. Kokres mank lakre tchutchja tchiwess tut. Kokres an lakre mussja hatseh tiri bacht.

²⁰ Miro tchawo, hoske rodeh tiri bacht pash i wawareskri romni? Hoske kameh i wawar romjat trujel te taprell?

²¹ O baro Dewel dikell, har hakeno djiwell. Kowa, hoi hakeno krella, djinell lo.

²² O tchilatcho koowa pandell koles, kai kowa krella. Leskri doosh hi har shelle, hoi les pandenn.

²³ Sawo merella doleske, kai mukas job peske tchi te penell. Dran leskro dinlepen djal lo nashedo.