Gosewe laba 4 - O Debleskro Drom 2021 (Sinte)

O tchatcho goswepen hi o feteder koowa

¹ Mire tchawe, shunenn ap kowa, hoi me, tumaro dad, tumenge pashel anau. Denn jak ap mire laba, te wenn gosewo!

² Mire laba hi latcho. Doleske ma bistrenn len!

³ Har me gomme i tikno tchawo homs pash miro dad, kek wawar tchawo his miri dat har man,

⁴ kote sikras lo man, har te djiwap, un penas: An tiro dji le mire laba pre un biste len gar! Rike ap mire laba, palle djiweh.

⁵ Kre lauter, te wess gosewo un haiwess, hoi mishto hi. Ma biste mire laba! Kre jaake, har tuke penom!

⁶ Ma muk o goswepen! Te hal gosewo, weh tu win lino dran o tchilatchepen. Te kameh o goswepen, hi lo har i sorelo kheer trul tute.

⁷ O feteder koowa, hoi nai leh, hi o goswepen. Doleske kre lauter, te less les!

⁸ Hidje o goswepen pral an tiro djipen, palle krell lo tut bares. Rike o goswepen soreles, palle dikenn i wawar pre ap tute.

⁹ Har i rajeskri stadi ap tiro shero hi o goswepen tuke. Awa, har i rajeskri stadi krell lo tut shukar.

¹⁰ Shun miro tchawo, un de jak ap miro rakepen, jaake te djiwess i lengsto djipen.

¹¹ Me anau tut ap o drom, kai dikeh, har te djiwess gosewes. Me sikrau tut o tchatcho drom.

¹² Ap kau drom hi tuke kek barra tchiddo, hoi tire herja nai pale rikrenn. Ninna te nasheh sik, hi tchi koi, pral koleste tu nai pereh.

¹³ Atch pash kowa, hoi tuke siklo was, muk kowa gar! Rike tut ap kol gosewe laba! Dran lende well tut i latcho djipen.

¹⁴ Ma dja ap o drom, kai i tchilatche djan! Ma kre har jon!

¹⁵ Muk lengro drom ap i rig tchiddo, ma dja ap leste! Risse tut lestar krik, un dja dureder!

¹⁶ Kol menshe nai sowenn gar jaake rah bis te kran le tchomone tchilatcho. Lenge well o sopen randedo, te anan le gar jekes an i bibacht.

¹⁷ Lengro tchilatcho koowa hi lengro chapen, hoi krell len tchalo. Jon djan i sorjah ap i wawarende pre. Un kowa hi lenge shukar har te pijenn le mool.

¹⁸ O drom kolendar, kai o tchatchepen krenn, hi har o kham, hoi taissarlakro pre djal, un o diwes anell un sorleder well bis te hi lo pralstunes tardo.

¹⁹ O drom kolendar, kai o tchilatchepen krenn, hi har i kali rat; jon nai dikenn gar, pral hoi jon perenn.

²⁰ Miro tchawo, de jak ap kowa, hoi rakrau! Shun mishto ap mire laba!

²¹ Ma biste len! Rike len an tiro dji!

²² Kol laba anenn o djipen un o sastepen kolenge, kai len pre lenn.

²³ De jak ap kowa, hoi patseh dur an tiro dji! Kolestar well o djipen.

²⁴ Muk kek chochene laba dran tiro mui te well! Tiro rakepen te well mishto un tchatcho!

²⁵ Muk tuke tchi an i jaka te well! Dik glan tute un gar tchatches un serwes!

²⁶ De jak te djas i tchatcho drom! Un rake tiro djijeha pral lauter hoi kreh!

²⁷ Dja gar tele kau dromestar, gar tchatches un gar serwes. Rike tire herja pale o tchilatcho dromestar!