Gosewe laba 28 - O Debleskro Drom 2021 (Sinte)

¹ O tchilatcho hi ap o naashepen, ninna te lell les kek palla. Kowa, kai an o tchatchepen tardo hi, hi har i terno lewo un darell tchi.

² Te hi bud tchilatchepen an o them, wenn ninna bud raja pre. Te well sawo mursh o rai, kai djinell bud un haiwell lauter mishto, palle hi o tchatchepen i rah tsiro an o them.

³ I tchorwelo mursh, kai was baro un rikrell i tchorwelen tele, hi har depen, hoi lauter krik thowell un o djob paash krell.

⁴ Kolla, kai mukan o Debleskro drom, sharenn i tchilatchen. Kolla, kai djan ap o Debleskro drom, kurenn pen lentsa.

⁵ Tchilatche menshe haiwenn gar, hoi o tchatchepen hi. Kolla, kai o baro Debles rodenn, kolla haiwenn lauter mishto.

⁶ Hi feteder te hal tchorwelo un djiweh i djudjo djipen, har te wals brawelo un djals ap bange dromma.

⁷ Kowa, kai o Debleskro drom djal, haiwell, hoi mishto un gar mishto hi. Kowa, kai i maal kolentsa hi, kai tchi-molde hi, anell ladj ap peskro dadeste.

⁸ Kowa, kai bare lowe kolendar lell, kolen pash leste sijaan hi, un krell pes koleha braweles, koleskro brawlepen lell sawo mensho, koles i baro dji i tchorwelenge hi un lende dell.

⁹ Kowa, kai kamell tchi o Debleskro dromestar te djinell, un palle mangell lo tchomone o baro Deblestar, koleskro mangepen hi djungelo glan o Debleskre jaka.

¹⁰ Kowa, kai anell o Debleskre menshen ap i tchilatcho drom, kowa perell kokres an i gruba. Kolla, kai kek doosh ap pende anan, lenna latcho koowa.

¹¹ O brawelo hi gosewo an peskre jaka, un o tchorwelo, kai tchatchepah gosewo hi, dikell, koon glan leste hi, un perell gar ap leste dren.

¹² Te hi kolen penepaske, kai an o tchatchepen tardo hi, palle hi bachtelo tsiro. Te well i tchilatchen penepaske, palle khatrenn pen i menshe.

¹³ Kowa, kai peskri doosh khatrell, kowa well gar dur an peskro djipen. Kowa, kai penell, hoi lo kras, un mukell peskri doosh, hatsell o Debleskro kamlepen.

¹⁴ Bachtelo hi kowa, kai hako tsireske o Debleha djiwell! Kowa, kai mukell peskro dji har i bar te well, perell an i bibacht.

¹⁵ I tchilatcho, kai hi o baro rai pral tchorwele menshende, hi har i lewo, hoi bares gole dell, un har i diwjo viecho, hoi bokell ap peskro chapen.

¹⁶ I rai, kai haiwell gar mishto peskre menshentsa trujel te djal, krell bud doosh. Koles, kai kamell gar chochepah braweles te well, koles well i lengsto djipen.

¹⁷ I mensho, kai i wawares mulo das, kowa atchell ap o naashepen, jaake rah har djiwell lo. Kek te rikrell les pre!

¹⁸ Kowa, kai i djudjo djipen djiwell, well win lino dran i bibacht. Kowa, kai ap dui dromma djal, perell ap jekeste.

¹⁹ Kowa, kai ap peskri phub budrell, les hi doha maro. Kowa, kai tchi-moldo koowa krell, well tchorwelo.

²⁰ I murshes o labestar hi bacht an bud koowa. Kowa, kai kamell sik braweles te well, anell ninna doosh ap peste.

²¹ Te dikeh latcheder ap o braweleste har ap o tchorweleste, hi kowa gar mishto. I kotar mareske nai anell i mursh doosh ap peste.

²² Koles, kai bok pal i lowe hi, nashell o brawlepen palla, un djinell gar, te well jaake o tchorwlepen pral leste.

²³ Te peneh jekeske, hoi job gar mishto kras, palle well ko tsiro, kai parkrell lo pes pash tute. Un kowa budeder, har te rakrals leske pal o mui.

²⁴ Koon peskro dades un peskri dat wi-randell un penell ‘kowa hi kek doosh’, sawo hi gar feteder har i tchorepaskro.

²⁵ Kowa, kai bokell pal i lowe, sawo anell tchingepen pre. Kowa, kai rikrell pes ap o baro Debleste, lell budeder har doha te chal.

²⁶ Dinelo hi kowa, kai krell kokres, hoi peskro dji leske penell. Koon djiwell goswepah, well dran i bibacht win lino.

²⁷ Kowa, kai dell i tchorweleste, koles well doha djipaske. Kowa, kai jaake krell, har te dikell lo o tchorweles gar, pral koleste rakrenn bud i bibacht win.

²⁸ I tchilatche, te wenn le raja, palle khatrenn pen i menshe. Jon te merenn, palle wenn kolla budeder, kai o tchatchepen krenn.