Gosewe laba 18 - O Debleskro Drom 2021 (Sinte)

¹ Koon pes i wawarendar krik rikrella, rodell, hoi peske kokres shukar hi, un kamell gar dren te dikell, hoi latcho leske wals.

² I dinelo kamell tchi te haiwell, job kamell te sikrell, hoi job lauter djinell.

³ Tchilatchepen un ladj djan khetne. Un kai ladj hi, koi i ninna praassepen.

⁴ I laba i gosewo menshestar hi har telstune panja, hoi nashenna an i phub un denn djipen.

⁵ Hi gar mishto, te dell i tchatchepaskro mursh koles tchatchepen, kai i doosh ap peste anas, un shunell gar ap koleste, kai an o tchatchepen tardo hi.

⁶ Kowa, hoi i dinelo rakrell, anell tchingepen. Un leskro mui dell pal dawa gole.

⁷ O rakepen o dinelestar anell les an i bibacht. Un job taprell pes kokres an peskre laba.

⁸ Te shunah djungelo rakepen pral i wawarende, hi kowa menge har shukar chapen, un djal menge tele har djet.

⁹ I tchi-moldo, kai kamell gar te budrell, hi gar feteder har kowa, kai marepen un merepen anell.

¹⁰ O baro Dewel hi har i baro sorelo kheer. Kowa, kai an o tchatchepen tardo hi, nashell pash leste un khatrell pes pash leste.

¹¹ Glan i braweleskre jaka hi leskro brawlepen har i sorelo foro un har i bari massuri trul leste.

¹² Pre-phurdepen well glan o perepen. Kolenge, kai krenn pen gar bares, well ko tsiro, kai sharenn len i wawar.

¹³ Shun! Un palle rake! Te kreh wawartchandes, hal dinelo un hunte ladjess tut.

¹⁴ I mensho kai sorelo an peskro dji hi, nai hidjrell peskro nasslepen. Te hi leskro dji phagedo, har nai hidjrell lo peskro pharepen?

¹⁵ I gosewo mensho kamell bud te djinell, un krell peskre kanda pre, te haiwell lo, hoi tchatcho hi.

¹⁶ I mensho, kai i wawaren shukar koowa dell, krell peske i wudja pre pash i pralstunende.

¹⁷ An i tchingepen dikell win, har te wals koles tchatcho, kai glanstunes rakrell. Te well palle o wawar, well win, kones tchatchepah tchatches hi.

¹⁸ Te tchingrenn pen dui sorele, un tikne kashta wenn witsedo, te well diklo, kones tchatcho hi, djal o tchingepen krik, un jon mukenn pendar tele.

¹⁹ I phraal, kai dukedo was an peskro dji, mukell gar peha te rakrell, un hi pandlo har i foro, kai hi i soreli massuri trul leste. Un o tchingepen hi har ko kashteskro, hoi o foreskro wudar pandell.

²⁰ I mursh lell, hoi leskro mui rakras. Dran leskre laba lell lo doha djipaske.

²¹ Kol laba, hoi jek rakrell, nai anenn leske o merepen un ninna o djipen. Un kowa, kai bud rakrell, dikella, hoi leskre laba leske dren anenn.

²² Koon i romjat hatsas, hatsas i bacht. O baro Dewel dikas latches ap leste.

²³ O tchorwelo mangell o ropah, o brawelo rakrell pale i djijeha, hoi hi har i bar.

²⁴ Dell mala, kai anenn tut an i bibacht. I tchatcho maal rikrell budeder ap tute har i phraal.