Gosewe laba 15 - O Debleskro Drom 2021 (Sinte)

¹ I kamlo lab krell te djal o wawareskri choli pale. I lab, hoi o wawares dukrell, krell les chojedo.

² O gosewo rakrell jaake, te haiwenn i wawar, hoi mishto hi. Dran o narweleskro mui well tchi har dinlepen.

³ I jaka o baro Deblestar dikenn lauter, kowa, hoi i tchilatche krenna, un kowa, hoi i latche krenna.

⁴ I latcho lab, hoi i wawares soor dell, hi har o ruk, hoi djipen della. I midjak lab phagell leskro dji.

⁵ O dinelo shunell gar ap leskro dadeste, te dell lo les trad. Kowa, kai shunell koi pre, hi gosewo.

⁶ Kowa, kai an o tchatchepen tardo hi, les hi budeder har les hunte well djipaske. Kowa, hoi i tchilatcho khetne lell, anell leske bibacht.

⁷ I gosewengro rakepen sikrell i wawarende, hoi lenge mishto hi. Kowa, hoi i dinelen an o shero hi, hi tchi moldo.

⁸ O baro Dewel dikell chojedes ap kowa, hoi o tchilatcho leske anell. Te mangenn les kolla an, kai an o tchatchepen tardo hi, dikell lo latches ap lengro mangepen.

⁹ O baro Dewel dikell chojedes ap kowa, hoi i tchilatche krenn. Koon peskro tselo djijeha o tchatchepen krell, koles kamell job.

¹⁰ Kolla, kai o Debleskro drom mukenn, lenn i phari phagi. Koon mukell pes tchi te penell, hunte merell.

¹¹ O baro Dewel djinell, hoi hi an o telstunepen un an o mulengro them. Har bud budeder djinell job, hoi an i menshengre djia hi.

¹² O pre-phurdo choirell pes pral koleste, kai leske penell, hoi lo gar mishto kras. Un job djal gar pash kolende, kai gosewo hi.

¹³ I bachtelo dji mukell o mujes te sal. Kones i pharo dji hi, koles hi tchi sapaske.

¹⁴ Jek, kai haiwell, hoi mishto un gar mishto hi, kowa rodell, har te djinell lo gomme budeder. O narwelo bokell pal dinelo koowa.

¹⁵ Kolen, kai i pharo dji hi, kolenge hi hake diwessa tchilatche. Jekes, kai shukapen an o dji hi, leskro dji giwell un bashrell hako diwes.

¹⁶ Hi feteder, te hal tchorwelo un djiweh o baro Debleha, har te hi tut i baro brawlepen un hunte daress halautereske.

¹⁷ Hi feteder te hi tut shacha te chal tire malentsa, har latcho grumjengro mass kolentsa, kai hi choli an lende.

¹⁸ I mursh an koleste choli hi, anell tchingepen. Jek, kai gar sik chojedo well, kowa lell i jag dran o tchingepen.

¹⁹ O drom kolendar, kai kamenn gar te budrell, hi pherdo subjengre burra. Kolenge, kai o tchatchepen krenn, hi kek barra an o drom tchiddo.

²⁰ I gosewo tchawo krell peskro dades un peskri dat bachteles. I dinelo sal pral lende.

²¹ Kones tchi an o shero hi, kowa kamell narwelo koowa. I mursh, kai haiwell, hoi mishto un gar mishto hi, atchell ap o tchatcho drom.

²² Kowa, hoi jekes an o shero hi, djal gar mishto, te putchell lo gar i wawarendar, hoi jon patsenna. Kote, kai bud menshe hi, kai denn pengro goswepen pashel, kote djal mishto.

²³ Bachtelo hi o mursh, te djinell lo, hoi te rakrell lo. Har latcho hi o tchatcho lab ap o tchatcho tsiro.

²⁴ Kowa, kai haiwell, hoi mishto un gar mishto hi, koleske djal peskro drom pre an o djipen. Un job rikrell pes pale o dromestar, kai djal tele pash i mulende.

²⁵ O baro Dewel phagell o kheer kolestar, kai pre-phurdo hi. Job dell jak, te lell kek koi phub i romjatar krik, kolakro rom meras.

²⁶ O baro Dewel dikell chojedes ap ko midjak koowa, hoi lell pes i tchilatcho glan. Latches dikell lo ap koleste, kai rakrell latche laba.

²⁷ Koon chochepah peskro brawlepen khetne lell, anell peskri familja an i bibacht. Koon mukell pes gar te ginell, sawo djiwell.

²⁸ Koon an o tchatchepen tardo hi, rakrell peskro djijeha glan kowa job tchomone penell. Dran o mui o tchilatchestar wenn tchilatche laba win har diwjo pani.

²⁹ O baro Dewel hi dur krik kolendar, kai tchilatcho hi. Job shunell kowa, hoi kolla lestar mangenna, kai an o tchatchepen tardo hi.

³⁰ Te dikeh latches ap jekeste, well lo bachtelo. Te peneh leske i latcho lab, well lo sorelo.

³¹ Te shuneh ap jekeste, kai penell tuke, hoi tuke mishto hi, palle hal mashkral i gosewende.

³² Koon gar shunell, te well lo trad dino, tchinell pes an peskro mass. Koon mukell pes tchomone te penell, kowa well gosweder.

³³ Kolla, kai djiwenn o baro Debleha, dikenn dren, hoi lenge mishto hi, un wenn gosweder. Kolenge, kai krenn pen gar bares, well ko tsiro, kai sharenn len i wawar.