Ester 7 - O Debleskro Drom 2021 (Sinte)

O Haman well ap i kasht pre-bladedo

¹ Un o baro rai un o Haman wan pash o chapen, hoi i rani Ester kras.

² Un o baro rai putchas ninna ap kau duito diwes, har jon i mool pijan: “Hoi hi kowa, hoi tu mandar mangeh, rani Ester? Me dau les tute. Hoi kameh tu? Un te kameh o paash lauterestar hoi man hi, kowa well tut dino!”

³ Kote penas i rani Ester: “Miro baro rai, te hal mange latches, un te hi mishto an tire jaka, mange kowa te dell, hoi me tutar mangau, palle, miro baro rai, muk man te djiwell, man un mire menshen. Kowa hi, hoi me kamau.

⁴ Mer wam bikedo, me un mire menshe, te was mer maredo, jaake te atchell kek mendar djido. Te wams mer kokres bikedo, mursha un djuwja, te was ginle budepangre, kroms miro mui gar pre. Kowa wals gar phares doha, te wap koleha pash o baro rajeste.”

⁵ Kote putchas o baro rai Ahasveros i ranjatar Ester: “Koon hi kowa? Un kai hi lo, koles an o shero was, te krell lo sau koowa?”

⁶ Un i Ester penas: “Kowa, kai lell men palla un kamell men te marell, kawa hi ko tchilatcho mursh Haman!” Kote tapras o Haman i daar glan o baro rajeste un i ranjate.

⁷ Un o baro rai stas chojedo pre kotar, kai le mool khetne pijan. Un djas win an i baar pash peskro kheer. Un o Haman atchas pash i ranjate Ester, te mangell lo latar peskro djipen. Job dikas koi bibacht, hoi pral leste well, hoi o baro rai peske glan las.

⁸ Har was o baro rai dran i baar pale pale an koi isema, kai jon khetne mool pijan, dikas lo o Haman, kai glan i diwana tchiddo his, kai i rani hi. Koi das lo gole: “Kamell lo kanna pash mande an miro kheer i ranjake tchomone te krell?” Kol laba his gomme gar dran o baro rajeskro mui tseles win, koi tchakran i budepangre o Hamaneskro shero.

⁹ Un jek o pralstunendar, o Harbona, penas: “Ake, kote pash o Hamaneskro kheer hi o kasht tardo, hoi hi i paash-sheel mussja baro, koles o Haman mukas pre te tchiwell o Mordekajeske. Kawa hi ko mursh, kai o baro rajeske penas, kai murshen glan his, te marenn le les.” Kote penas o baro rai: “Bladenn les koi pre!”

¹⁰ Jaake bladan le o Hamanes ap ko kasht pre, koles job o Mordekajeske mukas pre te tchiwell. Un i choli o baro rajestar djas pale.