Debleskro tsiro 8 - O Debleskro Drom 2021 (Sinte)

O mangepen o Debleske menshendar

¹ Un har o terno bakro i eftati dori pre pandas, hoi ko liil khetne rikras, rakras kek buder an o bolepen. I tikno tsiro rakran le tchi buder.

² Un me dikom kol efta bolepangren, kai glan o Debleskro beshepaskro tardo hi. Kolla lan efta phurdepangren.

³ Un i wawar bolepaskro was, un djas pash o Debleskri chatchepaskri. Les his i sonakaskro tcharo an o wast, an koleste gudlo kasht chatchedo wella, hoi mishto sungella. Un ko bolepaskro las bud gudlo kasht, te chatchrell lo les ap o Debleskro sonakaskro bob, hoi glan o Debleskro beshepaskro tardo hi, te well o latcho sungepen khetne o mangepah, hoi o Debleskre tchawe o Deblestar mangan.

⁴ Un ko latcho sungepen hadas pes pre dran leskro wast, un djas glan o Debleste khetne o mangepah kol Debleskre menshendar.

⁵ Un ko bolepaskro las ko tcharo, an koleste ko gudlo kasht chatchedo wella, un kras les pherdi jag, hoi job dran o Debleskri chatchepaskri las, un tchoras o tcharo win ap i phub. Koi das jag karje pral un tele, un das bari soreli gole, har koi gole, hoi o bolepen krella, te dell baro brishin, un te djal jag tele ap i phub. Un i phub trissas soreles.

I star phurdepangre

⁶ Un kol efta bolepangre, kai his len kol efta phurdepangre, lan len an i wasta, te phurdenn le dren.

⁷ Un o glanstuno phurdas an peskri phurdepaskri. Koi das brishin, hoi his har barra, un jag o rateha mashkral ap i phub. Un o triinto kotar i tseli phubjatar chatchras, un o triinto kotar i tsele rukendar chatchras, ninna o tselo senlepen.

⁸ Un o duito bolepaskro phurdas an peskri phurdepaskri. Koi was i bari kotar bar, hoi chatchella, an o baro pani witsedo. Un o triinto kotar o tselo baro panjestar was har o rat.

⁹ Koi meras o triinto kotar lauterestar, hoi an o baro pani djiwas. Ninna hako triinto shiffo djas paash.

¹⁰ Un ko triinto bolepaskro phurdas an peskri phurdepaskri: Un i bolepaskri momeli chatchas har jag, un peras tele ap i phub. Un koja peras ap o triinto kotar hako lengsto panjestar, ninna ap ko pani, hoi wella dran i phub win.

¹¹ Un ko bolepaskri momeli kharella shut. Un o triinto kotar kol panjestar was shutlo. Un bud kol menshendar, kai pijan ko pani, meran lestar.

¹² Un o starto bolepaskro phurdas an peskri phurdepaskri. Un o kham las i dap, un o triinto kotar lestar was kalo. Ninna o tchon un i wawar bolepangre momlia lan i dap. Un o triinto kotar lendar was kalo. Jaake chatchas o kham gar ap o triinto kotar ap o diwes, witar gar chatchan o tchon un i bolepangre momlia ap o triinto kotar an i rat.

¹³ Un me dikom dur pral ap o bolepen i baro tchirkles, un shunom, har job gole das: Bibacht, bibacht, bibacht! Te phurdenn i wawar triin bolepangre an pengre phurdepangren, palle wella i bari bibacht ap kolende, kai ap i phub djiwenna.