Debleskro tsiro 12 - O Debleskro Drom 2021 (Sinte)

I djuwel un o baro sap

¹ Un i baro koowa sikras pes ap o bolepen: I djuwel hi koi. Kolakro ripen hi o kham. Un tel lakre pire hi o tchon. Un ap lakro shero hi deesh-te-dui bolepangre momlia.

² Un joi hi an wawar koowa, un lakro ternepen kamell te well. Un joi dell gole i dukatar.

³ Un i wawar baro koowa sikras pes ap o bolepen: I baro lolo sap was. Un les hi efta shere un deesh shinga. Un ap hako shero hi shereskro sonakai.

⁴ Un leskri pori tserdell o triinto kotar kol bolepangre momelendar krik, un witsras len tele ap i phub. Un ko baro lolo sap hi glan koi djuwjate tardo, kai an o tsiro was, te well o ternepen. Un jaake sik, har ko ternepen wals, kamas les lo pre te chal.

⁵ Un joi las i mursh tchawes. Kowa te well o rai pral i menshende an i tsele themma ap i phub. Job anell len i sasterno wasteha. Un lakro tchawo was pre hadedo pash o Debleste, un pash leskro beshepaskro.

⁶ Un koi djuwel nashas an o mulo them, kai kek menshe djiwenna. Kote hi o Debles lake i kotar phub, kai atchell li deesh-te-dui-sheel-te-shob-desha (1.260) diwessa, un lell halauter, hoi lat hunte wella djipaske.

O Michael kurell pes o lolo sapeha

⁷ Un an o bolepen was i baro kurepen: O Michael un leskre bolepangre kuran pen o baro lolo sapeha un leskre kurepangre.

⁸ Un o Michael un leskre bolepangre his sorleder. Un o baro lolo sap un leskre kurepangre nashte atchenn buder gar an o bolepen.

⁹ Un o baro lolo sap was win witsedo. Job hi ko phuro sap, hoi kharella ninna Beng un Satan, ko chocheno, kai tserdell i menshen ap i tseli phub ap peskro drom. Job was tele witsedo ap i phub, un leskre kurepangre leha.

¹⁰ Un me shunom i sorelo rakepen an o bolepen, hoi penas: Kanna las men maro Dewel dran o bengeskro wast win. Maro Dewel sikras peskri soor, un was o rai pral i tsele menshende ap i phub. Un job das peskri tseli soor koles, kai job win rodas, te well lo o baro rai pral halauter. Tele witsedo hi ko phukepaskro, kai anas i doosh ap mare phralende glan o Debleste o diwes un i rati.

¹¹ Mare phrala his sorleder har ko phukepaskro. O terno bakro, hoi maredo was, kowa thowas lengri doosh peskro rateha tele. Mare phrala sikran i menshende o tchatcho drom pash o Debleste, ninna te wan le doleske maredo.

¹² Lauter kolla, kai djiwenna an o bolepen, lengro dji dell gole i bachtjatar. Kol wawar, kai djiwenn ap i phub un ap o baro pani, i bibacht well ap lende. Pash lende was o beng. Leske atchell gar bud tsiro. Kowa djinell lo. Doleske hi les i bari choli.

O lolo sap lell koi djuwjat palla

¹³ Un har ko baro lolo sap dikas, te was lo ap i phub witsedo, las lo koi djuwjat palla, kai ko tchawes las.

¹⁴ Un koi djuwjake wan tchirklengre mussja dino, har i baro tchirkles hi, te nai djal li an o mulo them ap ko kotar phub, kai joi nai djiwella dur krik ko sapestar. Kote atchell li triin-te-paash bersha. Un kote lell li halauter te chal un te pijell.

¹⁵ Un ko sap kras peskro mui pre, un tchungras bud sorelo pani pal koi djuwjate win, te tassell li an ko pani.

¹⁶ Koi kras i phub peskro mui pre, un pijas ko tselo sorelo pani, hoi ko baro lolo sap dran peskro mui win tchungras.

¹⁷ Un ko baro lolo sap was chojedo ap koi djuwjate, un djas koi, te marell lo lakre tchawen. Kolla hi kol menshe, kai shunenn ap o Debleskro lab, un djan ap o Jesuseskro drom.

¹⁸ Un o baro lolo sap his pash o baro pani tardo.