Debleskro tsiro 11 - O Debleskro Drom 2021 (Sinte)

Kol dui Debleskre rakepangre

¹ Un jek das man i kasht an o wast, un penas ap mande: “Tchip kowa ap o tselo Debleskro baro kheer, un dik palla, har baro kowa hi. Dik ninna palla, har baro o Debleskri chatchepaskri hi. Un dik, kitse menshe kote o Debles sharenna!

² Un ko kotar phub glan o Debleskro baro kheer, kote tchip ko kasht gar pre. Ko kotar phub well kolende dino, kai kek bibolde hi. Un jon stakrenn o Debleskro foro khetne star-deesh-te-dui tchon.

³ Un me bitchrau dui rakepangren an ko foro. Kolla penenn i menshenge o tchatchepen pral mande. Lengre ripja hi kerdo dran gone. Deesh-te-dui-sheel-te-shob-desha (1.260) diwessa penenn jon lenge mire laba.”

⁴ Kolla dui mursha hi kol dui djeteskre ruka un kol dui momlia, hoi hi tardo glan o Debleste, kai hi o rai pral kai phub.

⁵ Un te kamell jek te dukrell lo len, palle djal i jag dran lengro mui win, un chatchrell les pre. Jaake merenn lauter kolla, kai kamenn len tchilatchepen te krell.

⁶ Len hi i soor, te rikrenn le o brishin pale, jaake te dell kek brishin ap ko tsiro, kai jon o Debleskro lab penenna. Un len hi i soor pral o pani, te nai krenn le dran kol tsele panja rat. Ninna hi len i soor, te nai anenn le haki bibacht pral i phub, jaake bud kope, har jon kamenna.

⁷ Un te rakran jon i tsele laba, hoi o Dewel lenge penas, palle well o viecho dran o telstunepen pre. Un ko viecho hi sorleder har jon, un marell len.

⁸ Un kal mule mursha hi ap o drom tchiddo an ko baro foro, kai ninna lengro rai ap o trushel maredo was. Kau foro hi har o foro Sodom un har o them Egiptia.

⁹ Un bud menshe dran hako them, haki natsjona, haki harmenatsjona un hako rakepen dikenn kol mule murshen ap o drom tchiddo triin diwessa un i paash diwes, un mukenn gar, te wenn jon paskedo.

¹⁰ I menshe ap i phub hi bachtelo, un giwenna un khelenna. Un jek bitchrell o wawareske shukar koowa. Jaake bachtelo hi le, te hi kol dui Debleskre rakepangre mulo, kai dukran kolen, kai ap i phub djiwenna.

¹¹ Un me dikom: Pal kol triin-te-paash diwessa kras o Dewel len pale djido. Un jon stan pre. Un i bari daar tapras kolen, kai kowa dikan.

¹² Un kol dui shunan i sorelo rakepen dran o bolepen, hoi ap lende penas: “Awenn kate pre!” Un jon djan an o bolepen pre. Un lauter kolla, hoi chojedo ap lende his, dikan kowa.

¹³ Un ap jek kopo trissas i phub soreles. Un o deshto kotar ko forestar peras khetne. Un efta serja (7.000) menshe wan maredo. Un kol wawaren tapras i bari daar, un jon sharan o Debles, kai an o bolepen hi.

¹⁴ I duiti bibacht hi pal lende. Un i triinti bibacht wella sik.

I eftati phurdepaskri

¹⁵ Un ko eftato bolepaskro phurdas an peskri phurdepaskri. Koi his i rakepen an o bolepen, un bud dan bari gole, un penan: “Kanna hi o Dewel un leskro tchawo, o Jesus Kristo, i raja pral i tsele menshende ap i phub hako tsireske.”

¹⁶ Un kol biish-te-star tchatchepangre phure, kai glan o Debleste ap pengre beshepangre beshdo hi, kolla witsran pen glan o Debleste tele, un sharan les,

¹⁷ un penan: Mer parkrah men pash tute, maro rai. Tu hal o sorelo Dewel. Tu djiweh kanna har djiwal an o phuro tsiro. Tu sikral tiri bari soor, un wal o rai pral halauter.

¹⁸ I tsele natsjone choiran pen pral tute. Doleske was tiri choli pral lende. Kanna hi o tsiro kai, te well o tchatchepen wi-rakedo pral i mulende. Kanna was ko tsiro, te dess tiro brawlepen kolende, kai tuke budran, kai an tiro lab rakran, lauterende, kai tire menshe hi, un tut sharenna, un tutar darenna, i tikne har i bare. I tsiro hi ninna kai, te maress kolen, kai i menshen ap i phub maran.

¹⁹ Un o Debleskro kheer an o bolepen was pre kerdo. Un an o Debleskro kheer dikom me ko sonakaskro mochton, hoi sikrella, kai o Dewel o maal peskre menshendar hi. Un i jag das karje dran o bolepen pre te tele. Un o bolepen das bari gole, har koi gole, hoi o bolepen della, te dell baro brishin un te djal jag tele dran o bolepen. Un i phub trissas, un das brishin har bare barra.