Debleskri gili 99 - O Debleskro Drom 2021 (Sinte)

O baro Dewel hi kokres o tchatcho Dewel

¹ O baro Dewel hi o baro rai. Job hi beshdo pral i Cherubim. Lestar darella i phub, un hake themma trissenna.

² Sorelo hi o baro Dewel an o foro Zion, o pralstuno hi lo pral i tsele themma.

³ Mu hadenn le lauter tiro baro un railo lab! Tu kokres hal o tchatcho Dewel.

⁴ Tuke hi bari soor. Tu hal o baro rai, kai kamell o tchatchepen o djijestar. Tu penal, hoi tchatcho hi, un tchiwal o tchatchepen pre an o them Israel, te djan i tchatchepangre mursha pal o tchatchepen.

⁵ Hadenn maro baro Debles! Un perenn ap i phub glan i beshepaskri, kai job peskre herja pre tchiwella. O baro Dewel kokres hi o tchatcho Dewel.

⁶ O Mose un o Aron his leskre rashaja, un o Samuel his mank kolende, kai les an-mangan. Jon dan ap o baro Debleste gole, un job shunas len.

⁷ Dran i wolka rakras lo lentsa, un jon rikran leskre laba, un kran, hoi job lendar kamas.

⁸ Baro Dewel, tu hal maro Dewel. Tu shunal len, un lal i doosh tire menshendar krik, ninna te dal len i phagi koleske, hoi jon kran.

⁹ Hadenn maro baro Debles! Mangenn les an ap leskri berga, kai job djiwella. Maro baro Dewel kokres hi o tchatcho Dewel.