Debleskri gili 97 - O Debleskro Drom 2021 (Sinte)

O Dewel hi o baro rai, kai djal pal o tchatchepen

¹ O baro Dewel hi o baro rai! Doleske te giwell i phub un sal! Ninna kol bud panjengre themma te wenn le bachtelo!

² Kale wolke hi trul leste trujel. Job hi i baro rai, kai djal pal o tchatchepen, un rakrell o tchatchepen win pral i menshende.

³ Glan leste djal i jag, un chatchrell halauteren, kai ap leste djan.

⁴ I jag dran o bolepen, hoi tele ap kai phub karje dell, mukell i rat win dikell har o diwes. Un i phub dikell kowa un trissell.

⁵ Jaake har i momeli tele chatchrell, wenna bare berge tikno glan o baro Debleste. Job hi o baro rai pral i tseli phub.

⁶ O bolepen sikrell leskro tchatchepen, un leskro railepen dikenn i tsele menshe.

⁷ Ladj ap kolende, kai krenn penge wawar debla, un sharenn pen pengre mule deblentsa! Perenn tele ap i phub, tumer wawar debla, glan o baro Debleste!

⁸ Tu, baro Dewel, hal i rai, kai djal pal o tchatchepen. Kowa shunenn i menshe an o foro Zion un hi bachtelo. Un kolla an o them Juda sanenn un khelenn i bachtjatar.

⁹ Tu, baro Dewel, hal o pralstuno pral i tseli phub. Tu hal bareder har i tsele debla.

¹⁰ Tumer, kai o baro Debles kamenna, stakrenn o tchilatchepen khetne. O baro Dewel rikrell peskre wasta pral o djipen kolendar, kai leskre hi, un lell len win dran o wast i tchilatchendar.

¹¹ I momeli djal pre koleske, kai an o tchatchepen tardo hi. Un bachtelo well kowa, kai o tchatcho drom djal.

¹² Awenn bachtelo pral o baro Debleste, tumer, kai an o tchatchepen tardo han! Un parkrenn tumen pash leste, kai kokres o tchatcho Dewel hi!