Debleskri gili 96 - O Debleskro Drom 2021 (Sinte)

O Debleskro railepen hi baro

¹ Giwenn o baro Debleske i newi gili! Tumer menshe ap i tseli phub giwenn gilja o baro Debleske!

² Giwenn leske, o baro Debleske! Sharenn les! Penenn i menshenge, te hi job kowa, kai lell win dran o tchilatchepen.

³ Penenn kolenge, kai les gar prindjrenna, hawo railepen les hi. Penenn i menshenge an hake themma hawo baro koowa job kras.

⁴ O baro Dewel hi o pralstuno, un hakeno hunte sharell les. Mank i tsele wawar debla hi job kowa, konestar daras mer.

⁵ I debla i wawar menshendar hi chochene debla. O baro Dewel hi kowa, kai o bolepen kras.

⁶ Job hi bareder har hako wawar. Shukapen hi trul leste, Leskri soor un leskro railepen wenn diklo an leskro kheer.

⁷ Tumer dran i wawar themma, sharenn o baro Debles! Sharenn leskro railepen un leskri soor!

⁸ Krenn leskro lab bares jaake har job moldo hi! Awenn glan leskro kheer, un anenn leske shukar koowa!

⁹ Mangenn o baro Debles an ap ko diwes, kai well lo an shukar un kutch ripja. I tseli phub hunte trissell glan leste.

¹⁰ Penenn i tsele menshenge: O baro Dewel hi o baro rai. Job kras i phub, te well li soreles tardo. Job hi o tchatchepaskro rai pral i tsele themma un djal pal o tchatchepen.

¹¹ O bolepen well bachtelo, un i phub sala. O baro pani stell i bachtjatar un lauter, hoi an leste hi.

¹² O them well bachtelo un lauter, hoi ap leste baro was. I tsele ruka an o weesh giwenna i bachtjatar

¹³ glan o baro Debleste. Job wella. Awa, job wella, un anell o tchatchepen ap i phub. Job rakrell o tchatchepen win pral i menshende an hake themma. Un hi lengro tchatchepaskro rai, kai djal pal o tchatchepen.