Debleskri gili 92 - O Debleskro Drom 2021 (Sinte)

Hi shukar, te parkrah men pash o Debleste

¹ I gili, te giwell ap o Debleskro diwes.

² Har shukar hi, te parkrau man pash tute, o baro Debleste, te giwau gilja tuke, o pralstuneske,

³ te rakrau pral tiro latchepen taissarlakro, un pral tiro tchatchepen an i rat,

⁴ te bashrau tuke ap i deesh-dorjengri bashepaskri un ap i harfa.

⁵ Kowa, hoi tu kral, baro Dewel, mukell man bachteles te giwell. Kowa, hoi tire wasta lauter kran, sharau me.

⁶ Baro Dewel, hawo baro koowa kral tu! Hi phares menge te haiwas, hoi tuke an o shero djal.

⁷ I dinelo patsell kowa gar; un i narwelo haiwell les gar:

⁸ I tchilatche wenn baro har o senlepen. Kolenge, kai tchilatcho koowa krenna, djal mishto. Kowa lauter well, te wenn le krik lino hako tsireske.

⁹ Tu, baro Dewel, hal o pralstuno, un atcheh hake tsirenge.

¹⁰ Mer djinah, lauter, kai tut tchilatchepen kamenn, hunte merenn. Un lauter, kai tchilatcho koowa krenna, wenn krik tradedo.

¹¹ Man kral tu sorelo har i diwjo gurum, un makal man newo djeteha, hoi pral mande tchoral.

¹² Me dikau tele ap kolende, kai mange tchilatchepen kaman, un shunau i gole kol tchilatchendar, kai hadan pen ap mande.

¹³ Kolla, kai an o tchatchepen tardo hi, wenn sorelo har i senele palmtikre ruka. Jon well baro har i zedertikre ruka ap i berga Libanon.

¹⁴ Jon hi har ruka, kai hi tardo an o baro Debleskro kheer, un kai wenn senelo ap i platsa glan o Debleskro kheer.

¹⁵ Ninna te wenn le phuro, hi le senele, pherdi soor, un rukengre wenn ap lende baro.

¹⁶ Jaake dikah: O baro Dewel krell lauter tchatches. Job hi har i baro sorelo bar, kai nai khatrau man, un kek chochepen hi ap leste.