Debleskri gili 85 - O Debleskro Drom 2021 (Sinte)

I latcho tsiro o Debleskre menshenge

¹ I gili jekestar dran i familja Korach. Kai gili hi o rajeske pral i gipangre.

² Baro Dewel, tut his i dji tiro themeske, un lal o Jakobeskre pandle menshen win dran i tchilatche wasta.

³ Tu lal o tchilatchepen, hoi tire menshe kran, lendar krik! Lengri tseli doosh bistral tu.

⁴ Tu rikral tiri choli pale, un chatchral buder gar i choljatar.

⁵ Maro Dewel, kai tu lauter menge mishto kreh, ab ninna kanna ap mari rig! Muk tele tiri choljatar, hoi tut ap mende hi!

⁶ Kameh i tsele tsirja ap mende chojedo te atchell? Mukeh tu buder gar tiri choljatar tele?

⁷ Kameh men buder gar newi soor te dell, te wenn tire menshe pale bachtelo pral tute?

⁸ Baro Dewel, ab menge latches, un kre lauter menge pale mishto!

⁹ Kamoms te shunap, har o baro Dewel penell, te well an leskro them un leskre menshenge kek kurepen, jaake te djas mer gar ap dinele dromma.

¹⁰ Tchatchepah, job hi ap kolengri rig, kai leha djiwenna un ap leste shunenna. Un leskro railepen atchell an maro them.

¹¹ Palle well leskro latchepen ap mende, un mer rikrah soreles ap leste. Mer krah hoi tchatcho hi, un job dell men bacht an o dji.

¹² Kate ap kai phub rikrah mer soreles ap o Debleste. Un dran o bolepen well o Debleskro tchatchepen ap mende.

¹³ Awa, o baro Dewel mukell menge mishto te djal, un mari phub anell menge bud chapen.

¹⁴ Hako tsiro un ap hake dromma djal o baro Dewel pal o tchatchepen.