Debleskri gili 83 - O Debleskro Drom 2021 (Sinte)

Mo Dewel, kure tut kolentsa, kai kamenn o Israelengro them penge te lell

¹ I gili o Asafestar.

² Miro Dewel, rake! Muk tut te shunell! Atch gar pokones!

³ Dik! Kolla, kai choirenn pen ap tute, hi diwjo. Kolla, kai kamenn tuke tchilatchepen, hadenn pengro shero pral tute.

⁴ Jon tchiwenn pen khetne un rakrenn, har nai krenn le tire menshenge tchilatchepen. Pal o dumo krenn le win, te djan le ap kolende, kai khatrenn pen pash tute.

⁵ “Awenn”, penenn le, “Stakras len khetne, kol Israelitarjen! Kal menshenge hi kek platsa ap kai phub. Ko lab Israel hunte well bistedo!”

⁶ Jon hi jek dji un jek djipen un kran win, te djan le ap tute:

⁷ Kolla hi i menshe dran o Edom un dran o Ismael, dran o Moab, dran i Hagar,

⁸ dran o Gebal, o Ammon, un o Amalek, ninna i Filistarja un kol menshe dran o foro Tirus.

⁹ Ninna o Assur tchiwas pes ap lengri rig. Jon wan jek mussi i menshentsa, kai wenna pal o Lot.

¹⁰ Miro Dewel, kre lenge, har kral ap i Midianarja, ap o Sisera, un ap o Jabin pash ko tikno pani Kishon.

¹¹ Kolla wan mulo dino pash En-Dor, un atchan koi tchiddo, un wan tchik.

¹² Kre lengre pralstunenge har kral kol murshentsa o Oreb un o Seeb. Ap lengre tsele rajende kre jaake har kral ap o Sebach un o Zalmunna.

¹³ Kolla penan: “Mer kamah o Debleskro them menge te lell.”

¹⁴ Miro Dewel, phurde len krik har patria, har phuss an i baro ducho!

¹⁵ Ab lenge har i jag, hoi o weesh tele chatchrell, un pes an i berge dureder chal!

¹⁶ Bitche i baro phurdepen un trade len krik! Kre lenge daar tiro sorelo ducheha!

¹⁷ Kre, te wenn lengre sherja lolo i ladjatar, te putchenn le pal tute, baro Dewel.

¹⁸ An ladj un traash ap lende hako tsireske, te merenn le an i ladj.

¹⁹ Mu dikenn le, te hal tu kokres o baro Dewel un o pralstuno rai ap i tseli phub.