Debleskri gili 81 - O Debleskro Drom 2021 (Sinte)

I gili o Debleske, te giwell ap kol bare diwessa

¹ I gili o rajeske pral i gipangre, te giwell ap i bashepaskri, hoi kharella gittit. O Asaf kras kai gili.

² Giwenn i bachtjatar o Debleske! Job hi mari soor. Sharenn o Jakobeskro Debles!

³ Giwenn leske Debleskre gilja! Denn ap i pauka! Bashrenn ap i dorjengre bashepangre!

⁴ Phurdenn an i phurdepaskri ap ko diwes, kai well o tchon pale diklo, ninna ap ko diwes, kai well o tselo tchon diklo. Kowa hi o baro diwes, kai wah bachteles khetne.

⁵ Ap kau lab hunte rikrenn pen i Israelitarja. Kawa hi i tchatchepaskro lab, hoi o Jakobeskro Dewel lende das.

⁶ Kowa penas o Dewel o Josefeskre menshenge, har djas lo an o kurepen khatar i Egiptarja. Shunau i rakepen, hoi me gar prindjrom:

⁷ Me lom tumendar ko pharo koowa tele, hoi ap tumare phika his, un tumare wasta hunte hidjrenn buder gar kol phare barra.

⁸ Har tuke ropaske his, un tu pal mande gole dal, wom me un lom tut win. Tu putchal mandar, un me rakrom tuha dran koi wolka. Pash o pani Meriba lom tut an i jak, te dikap, har tu shuneh ap mande.

⁹ Mire menshe, shunenn ap mande, me dau tumen trad. Israel, shuness, hoi me tuke penau:

¹⁰ Pash tumende hunte well kek wawar dewel, un tu mangess kek wawar debles an!

¹¹ Me hom tiro baro Dewel, kai tut dran o them Egiptia win anas. Kre tiro mui dur pre, un me dau tut bud chapen.

¹² Mire menshe shunan gar ap mande. O Israel kamas man gar.

¹³ Jaake mukom len kowa te krell, hoi jon kaman, un mukom len pal pengro shero te djal.

¹⁴ Har kamoms me, te shunans mire menshe ap mande, te djals o Israel ap miro drom!

¹⁵ Sik anoms ladj ap kolende, kai ap lende djan, un tchiwoms miro wast phares ap lende.

¹⁶ Kolla, kai pen ap o baro Debleste choirenn, hunte witsrens pen tele glan leste. Lengri phagi atchals hako tsireske.

¹⁷ Un i Israelende doms o latcheder djob chapaske, un o feteder gwin, te wans le tchalo.