Debleskri gili 8 - O Debleskro Drom 2021 (Sinte)

Har baro hi miro Dewel!

¹ I gili o rajeske pral i gipangre, te giwell pash o bashepen ap i bashepaskri ochta dorjentsa. O David kras kai gili.

² Baro Dewel, maro rai, har railo hi tiro lab ap i tseli phub! Tiro railepen hi bareder har o bolepen.

³ Dran o mui i tchawendar un tikne tchawendar wenn kol laba, hoi sharenn tut. Jaake hunte rikrenn pengro mui kolla, kai kamenn tut gar un hi chojedo ap tute.

⁴ Me te dikau o bolepen, hoi tu tire gushtentsa kral, o tchon un i momlia an o bolepen, hoi tu kral,

⁵ palle putchau mandar: Hoi hi o mensho? Hoske well lo tuke an o shero? Hi lo tuke jaake kutch, te weh ap leskri rig?

⁶ Tu kral les gar bud tikneder har tut kokres. Baro un railo kral tu les.

⁷ Tu kral les rai pral halauter, hoi tire wasta kran. Lauter tchiwal tu tel leskre herja:

⁸ Bakre, busja un grumja, un i diwje vieche ninna,

⁹ i tchirkle an o bolepen un i matche an o baro pani, un lauter, hoi an o pani djiwell.

¹⁰ Baro Dewel, maro rai, har railo hi tiro lab ap i tseli phub!