Debleskri gili 71 - O Debleskro Drom 2021 (Sinte)

Kanna, kai phuro hom, ma muk mandar!

¹ Baro Dewel, me rikrau man ap tute. Muk man gar tchitcheske pash tute te well!

² Tu kreh, hoi tchatcho hi. Doleske ab tu ap miri rig un le man win dran i tchilatche wasta! Shun miri gole un rike man!

³ Ab mange har i baro sorelo bar, pash koleste nai nashau un man khatrau! Tu dal tiro lab, te wess ap miri rig. Tu hal mange har i baro sorelo kheer ap i barreskri berga, kai nai khatrau man.

⁴ Miro Dewel, le man win dran i wasta i tchilatchendar, un kolendar, kai o tchatchepen stakrenna, un i wawaren i sorjah tele rikrenna.

⁵ Miro rai, tu baro Dewel, ap tute dikau, fun tiknes pre patsom ap tute.

⁶ Miro tselo djipen rikrom man ap tute. Jaake rah har boldo wom, rikral tu tire wasta pral mande. Tut kamau me te sharell hako diwes.

⁷ Ninna te patsenn bud, kai praassal tu man, hal tu mange har i sorelo kheer, kai nai khatrau man.

⁸ O tselo diwes kamau te sharap tut un giwap tuke gilja.

⁹ Kanna, kai phuro hom, ma muk mandar! Ma dja mandar kanna, kai hi buder kek soor an mande!

¹⁰ Kolla, kai mange tchilatchepen kamenn, rakrenn pal mande. Kolla, hoi kamenn mange o djipen te lell, rakrenn khetne,

¹¹ un penenn: “O Dewel djas peske lestar. Las les palla un tapras les! Kek hi koi, kai les dran mare wasta win lell.”

¹² Miro Dewel, ab gar dur mandar! Kre sik, un ab ap miri rig!

¹³ Mu wenn le tele witsedo un merenn, kolla, kai mange o tchilatchepen kamenn. Praassepen un ladj mu well ap kolende, kai kamenn miri bibacht.

¹⁴ Me dikau hako tsiro ap tute un sharau tut bud un budeder.

¹⁵ Me penau i wawarenge, har tchatcho tire dromma hi. Hako diwes rakrau pral o latchepen, hoi tu lauter kral. Kowa hi budeder har nai haiwau.

¹⁶ Me wau un rakrau pral o sorelo koowa, hoi tu kral, miro rai, baro Dewel, un sharau tchi wawar har tiro tchatchepen.

¹⁷ Miro Dewel, tu hal miro sikepaskro fun tiknes pre, un ninna kanna rakrau me pral ko baro koowa, hoi tu lauter kral.

¹⁸ Ninna kanna, kai phuro wom, un mire balla parno wan, ma dja mandar, miro Dewel! Kamau te penap i tchawengre tchawenge un lauterenge, kai pal lende wenna, har sorelo tu hal.

¹⁹ Miro Dewel, tiro tchatchepen djal bis pash o bolepen. Tu, kai kreh baro koowa, koon hi jaake har tu, miro Dewel?

²⁰ Tu mukal bud un bari daar ap mande te well. Un tu deh man pale newo djipen, un aneh man pale win dran o telstunepen i phubjatar.

²¹ Tu kreh man an-diklo, un khosseh mire swa tele.

²² Jaake kamau me man pash tute te parkrell o bashepah ap i dorjengri bashepaskri, kai rikral tu tiro lab, miro Dewel. O bashepah ap i harfa kamau tuke gilja te giwell. Tu kokres hal o tchatcho Dewel, ko Dewel pral o Israel.

²³ Tu lal miro djipen win dran o merepen. Doleske dau gole i bachtjatar un giwau tuke gilja.

²⁴ Hako diwes penau dureder, har tu rikral pash mande. Un kolla, kai kaman miri bibacht, hunte wenn tikno un ladjenn pen.