Debleskri gili 7 - O Debleskro Drom 2021 (Sinte)

O Dewel dell man tchatcho

¹ I ropaskri gili, hoi giwas o David o baro Debleske, har o Benjaminari Kush leske o djipen phares kras.

² Baro Dewel, tu hal miro Dewel, pash tute khatrau man. Le man win dran i wasta kolendar, kai man palla lenna! Te weh tu gar ap miri rig,

³ wenn le har i lewo un taprenn man un dandrenn man. Un kek nai tserdell man mank lengre danda win.

⁴ Baro Dewel, tu hal miro Dewel, me te krom sawo koowa, hoi penan le, un te hi doosh ap mande,

⁵ te homs tchilatches ap kolende, kai mange latches kaman, un kolendar tchoroms, kai les mange phares kran, ninna te krom me lenge tchi,

⁶ palle mu lenn man palla kolla, kai hi chojede ap mande! Mu taprenn le man, un witsrenn man ap i phub, un mukenn le man an i tchik tchiddo!

⁷ Ab chojedo, baro Dewel, un hade tut ap kolende, kai chojede hi ap mande un ap mande djan. Un ab ap miri rig, un rake o tchatchepen win!

⁸ De i menshen dran i tsele themma khetne gole trul tute, un besh tut dur pral lende ap tiro tchatchepaskro stamin!

⁹ Baro Dewel, tu hal o baro tchatchepaskro rai pral i menshende dran i tsele themma. De man miro tchatchepen! Tu djineh, me hom tardo an o tchatchepen un kek doosh hi ap mande.

¹⁰ Tu hal i Dewel, kai an o tchatchepen tardo hi, un dikeh an hakeneskro dji un shero. Kanna kre, te nai krenn i tchilatche kek tchilatchepen buder! Kre kolen sorelo, kai an o tchatchepen tardo hi!

¹¹ O Dewel rikrell peskro wast pral mande. Job lell kolen dran i bibacht win, kai shunenn ap leste pengro tselo djijeha.

¹² O Dewel hi i tchatchepaskro rai, kai an o tchatchepen tardo hi. Job hi i Dewel, koleskri choli nai chatchella hako diwes.

¹³ Tchatchepah, pale las o tchilatcho peskro charo, un hadell peskro bogo, te dell lo karje.

¹⁴ Dik, peskro merepaskro charo un i faile, hoi chatchenna, hadas lo pre, te dell lo karje!

¹⁵ Les hi tchilatchepen an o shero, un midjak koowa an o dji. Un dran leste well chochepen.

¹⁶ Job hadas i cheb win, hoi djas dur tele, un peras palle kokres dren, – an koi cheb, hoi job i wawareske wi-hadas.

¹⁷ Koi bibacht, hoi kamas lo ap i wawareste te anell, was ap leskro shero pale. Ko tchilatcho koowa, hoi kamas lo i wawareske te krell, peras ap leste pale.

¹⁸ Me parkrau man pash o baro Debleste, te hadas lo o tchatchepen pre, un sharau o baro Debles, ko Debles pral halauter.