Debleskri gili 57 - O Debleskro Drom 2021 (Sinte)

Mo Dewel, pash tute nai khatrau man

¹ I gili o rajeske pral o gipangre, te giwell har koi gili ‘Ma mare men’. O David tchinas kai gili an ko tsiro, har job glan o Saul ap o naashepen his, un pes an koi grotta khatras.

² Kre tiro dji mange pre, miro Dewel! Kre tiro dji mange pre! Pash tute wau, te khatrap man. An tire mussja nashau, bis te kai bibacht krik djas.

³ Ap o Debleste, ko pralstuneste, dau me gole, ap koleste, kai miro koowa mishto krella.

⁴ Dran o bolepen mu well lo mange ap i rig, un lell man win dran o praassepen kolestar, kai man palla lell. O Dewel mu sikrell man, te hi lo mange latcho, un te rikrell lo pash mande.

⁵ Me hom tchiddo mank menshe, kai hi har lewe, kai kamenn man pre te chal. Lengre danda hi har tchurja un faile, un lengri tchip dell tchurje har i charo.

⁶ Sike tiro barepen, hoi bareder hi har o bolepen, miro Dewel! Tiro railepen mu well pral i tseli phub!

⁷ I netsa tchiwan le glan mire pire, te perap dren. I dori pandan le trul miri meen. Ap miro drom hadan le i cheb win, – un jon peran kokres dren.

⁸ Sorelo was miro dji, miro Dewel, sorelo was miro dji. Me kamau tuke te giwell un te bashrell.

⁹ Ste pre miro dji! Kamau te bashrap ap i dorjengre bashepangre. Kau diwes kamau me o khames pre te djangrell!

¹⁰ Mank i menshende dran bud themma kamau tut te sharell, miro rai. Glan i natsjone kamau tuke te giwell.

¹¹ Tiro latchepen hi jaake baro har o bolepen. Un tiro tchatchepen djal bis pash i wolke.

¹² Sike tiro barepen, hoi bareder hi har o bolepen, miro Dewel! Tiro railepen mu well pral i tseli phub!