Debleskri gili 53 - O Debleskro Drom 2021 (Sinte)

Dell kek mensho, kai lauter mishto krell

1 I gili o rajeske pral i gipangre, te giwell har koi gili ‘Mahalat’ . O David kras kai gili.

¹ I gili o rajeske pral i gipangre, te giwell har koi gili ‘Mahalat’. O David kras kai gili.

² Dinele hi le, kai rakrenn penge: “Hi kek Dewel.” Tchi-molde hi le. Lauter, hoi le krenna, hi djungelo un chocheno koowa. Kek hi koi, kai krell o latchepen.

³ O Dewel dikell dran o bolepen tele ap i menshende, te hatsell lo jekes, kai gosewo hi un pal o Debleste putchella.

⁴ Halauter rissran pen lestar krik, un djiwenn i djungelo djipen, jek har ko wawar. Kek hi koi, kai krell o latchepen, awa kek!

⁵ “Kolla, kai o tchilatcho koowa krenna, haiwenn tchi”, penell o Dewel, – “kolla, kai mire menshen chana har i kotar maro. Man denn le gar an-gole.”

⁶ Ap jek kopo taprenn le i traash, ninna te hi tchi koi, hoi len nai traash krella. O Dewel marell kolen, kai ap peskre menshende pre djan. Un lengre kokale atchenn tchiddo un wenn gar paskedo. O Dewel tchiwas len pale.

⁷ Har kamaus me, te wals kowa koi berga Zion tele, kai lell o Israel win dran i bibacht! Awa, har kamaus me, te anell o Dewel peskre pandle menshen pale! Palle stans o Jakobeskre tchawe i bachtjatar, awa, o tselo Israel wals bachtelo.