Debleskri gili 52 - O Debleskro Drom 2021 (Sinte)

Hoske phurdeh tut pre, tu sharepaskro?

¹ I gili o rajeske pral i gipangre. O David kras kai gili,

² har o Doeg, ko mursh dran o them Edom, pash o Saul was, un leske penas: “O David hi pash o Ahimelech.”

³ Hoske shareh tu tut tiro tchilatchepah, tu, kai kameh te well tut penepaske pral halauter! O latchepen o Deblestar hi o tselo diwes kai.

⁴ Tu rodeh, har te dukress jekes, un tiri tchip tchinella har i latchi tchuri, tu chocheno!

⁵ Tu kameh o tchilatchepen budeder har o latchepen. Un o chochepen kameh tu budeder har o tchatchepen.

⁶ Tu kameh laba, hoi phagenn, un rakreh dui tchipjentsa.

⁷ Doleske phagell tut ninna o Dewel hako tsireske. Job stakrell tut khetne, witsrell tut win dran tiro kheer, lell tut krik kai phubjatar, kai djiwah.

⁸ Un kolla, kai an o tchatchepen tardo hi, dikenn kowa un darenn un sanenn pral leste:

⁹ “Dikenn ko murshes! Kowa tchiwas gar peskro patsepen ap o Debleste. Na-a! Job patsas ap peskro baro brawlepen, un leskro tchilatchepen kras les sorelo.”

¹⁰ Me hom har i senelo djeteskro ruk an o Debleskro kheer. Me patsau ap o latchepen miro Deblestar kanna un hako tsiro.

¹¹ Me kamau man hako tsireske pash tute te parkrell, hoi tu lauter mange kral. Miro Dewel, me dikau ap tute glan i jaka tire menshendar, tu hal jaake latcho.