Debleskri gili 51 - O Debleskro Drom 2021 (Sinte)

Miro Dewel, biste miri doosh!

¹ I gili o rajeske pral i gipangre. O David kras kai gili,

² har o Debleskro rakepaskro Natan pash leste was, pal kowa o David i wawareskri romjat, i Batsheba, las.

³ Miro Dewel, tu hal jaake latcho, un tiro kamlepen hi baro! Dik latches ap mande! Un le ko tchilatcho koowa, hoi krom, mandar krik!

⁴ Thob miri doosh mandar tele, un le ko tselo tchilatchepen mandar krik, te wap pale djudjo!

⁵ Awa, djinau, kai anom doosh ap mande. Un ko tchilatcho koowa, hoi krom, hi man o tselo tsiro glan mire jaka.

⁶ Ap tute kokres krom, hoi tchilatcho hi. Awa me krom, hoi midjak hi glan tire jaka. Doleske hi tut tchatches an tiro rakepen. Tu kreh o tchatchepen, te deh man i phagi.

⁷ Doosh hi ap mande, jaake rah har hom ap kai phub, ninna har boldo wom, his o tchilatchepen ap mande.

⁸ Tu rodeh o tchatchepen an o mensheskro dji. An miro dji sikreh tu, har te wap gosewo.

⁹ Le miri doosh mandar krik! Palle hom djudjo an miro dji. Thob man! Un me wau parneder har gib.

¹⁰ Muk man pale bacht te haiwell! Tu phagal man, kanna muk man pale te stell!

¹¹ Ma dik ap miri doosh, un le o tchilatcho koowa, hoi krom, mandar krik!

¹² Miro Dewel, de man i newo dji, hoi hi djudjo un tuke kokres koi!

¹³ Ma trade man tutar krik! Ma le tiro ducho mandar krik!

¹⁴ Muk man te dikell, kai hal pash mande, te sal miro dji pale! De man i dji, hoi shunell ap tute!

¹⁵ Kolen, kai shunenn gar ap tute, kamau me tiro drom te sikrell, te mukenn le pengro tchilatcho drom, un wenn pale pash tute.

¹⁶ Me anom rat ap mande, ma de man mulo, miro Dewel! Tu hal o Dewel, kai lell man win dran o merepen. Un me kamau tiro tchatchepen te sharell.

¹⁷ Baro Dewel, kre miro mui pre, te rakrap, hoi sharell tut!

¹⁸ Vieche, hoi anenn le tuke, kameh gar. Te wals jaake, doms len tute. Vieche, hoi tuke chatchedo wenna, krenn tiro dji gar bachtelo.

¹⁹ Kowa, hoi tu kameh te well tuke anlo, hi i phagedo dji. Ap i mensheste, kai rowell pral peskri doosh, dikeh tu, miro Dewel, latches.

²⁰ Kre latchepen ap o foro Zion! Ab ap i rig kol menshenge an o foro Jerusalem, te wenn i barra o forestar pale newes pre-tchiddo!

²¹ Palle anenn le tuke latcho koowa an o tchatchepen, ninna vieche, hoi tuke tseles chatchedo wenn. Awa, palle wenn tuke terne gurma chatchedo ap tiri chatchepaskri. Un tu dikeh latches ap kowa lauter.