Debleskri gili 5 - O Debleskro Drom 2021 (Sinte)

Mo Dewel, sike man o drom, hoi tchatcho hi glan tute!

1 I gili o rajeske pral i gipangre, te giwell pash o bashepen ap i tikni phurdepaskri . O David kras kai gili.

¹ I gili o rajeske pral i gipangre, te giwell pash o bashepen ap i tikni phurdepaskri. O David kras kai gili.

² Baro Dewel, shun mire laba! Shun, har me ap tute rowau!

³ De jak ap miri gole! Tu hal miro baro rai un miro Dewel, koles me mangau.

⁴ Baro Dewel, sik taissarlakro dau gole ap tute. Sik taissarlakro wau pash tute un penau tuke, hoi mange ap o dji hi. Un dau palle jak, hoi tu mange peneh.

⁵ Tu hal i Dewel, kai tchilatche dromma gar kamella. Pash tute nai atchell i tchilatcho gar.

⁶ Kol pre-phurden kameh tu gar glan tire jaka te dikell, un tu choireh tut ap hakeneste, kai i wawarenge tchilatchepen krella.

⁷ Tu mareh kolen, kai o chochepen rakrenna. Praassedo hi glan o baro Debleste kolla, kolen doosh ap o rat i wawarendar hi, un kai i wawaren chochenn.

⁸ Mange hal latches un mukeh man an tiro kheer dren te djal. Me nai witsrau man tele glan tiro railo kheer, un nai mangau tut an.

⁹ Baro Dewel, sike man o drom, hoi tchatcho hi glan tute! Kre mange o drom, hoi te djap! Muk kolen te dikell, kai mange tchilatchepen kamenna, kai hal tu ap miri rig!

¹⁰ Ap lengro lab nai dell jek tchi. An lende hi tchilatchepen. Lengro rakepen anell o merepen. Jon rakrenn dui tchipjentsa.

¹¹ Tchip lengri doosh ap lengre shere, mo Dewel! Muk len te perell an pengre netse, hoi jon i wawarenge kran! Trade len tutar krik! Bud kope kran le o tchilatchepen. Pral tute hadan le pen.

¹² Bachtele wenn kolla, kai khatrenn pen pash tute! Kolla denn gole i bachtjatar o tselo tsiro. Tu rikreh tiro wast pral lende. Doleske sanenn un giwenn le – kolla, kai tiro lab kamenna.

¹³ Tu, baro Dewel, tchiweh tiri bacht ap kolende, kai an o tchatchepen tardo hi. Tu tchiweh tiro latchepen trul lende har i plaashka, jaake te nai dukrell len tchi.