Debleskri gili 41 - O Debleskro Drom 2021 (Sinte)

I mangepen ap o Debleste jekestar, kai nasselo hi

¹ I gili o rajeske pral i gipangre. O David kras kai gili.

² Bachtelo hi kowa, kai dell jak ap kolende, kai gar soreles hi. Ap ko diwes, kai les i bibacht taprella, lell o baro Dewel les win.

³ O baro Dewel rikrell peskre wasta pral leste, un rikrell leskro djipen, un krell, te djal leske mishto ap i phub. Un job mukell les gar an i tchilatche wasta te perell.

⁴ O baro Dewel dell les newi soor ap o nasslengro tchiben, un krell les sasto.

⁵ Me penom: “Baro Dewel, kre tiro dji mange pre! Me anom doosh ap mande. Kre man sasto!”

⁶ Kolla, kai kamenn mange tchilatchepen, rakrenn djungeles pral mande un penenna: “Kaana merell lo, te well leskro lab bistedo?”

⁷ Te well jek lendar pash mande, te dikell lo pal mande, palle well lo i tchilatcho djijeha. Job rodell i doosh, hoi nai anell lo ap mande pre. Te djal lo palle mandar win, rakrell lo chochepen pral mande.

⁸ Kolla, kai kamenn mange tchilatchepen, tchiwenn pengre shere khetne, un rakrenn djungeles pral mande.

⁹ “I bibacht hi ap leste”, penenn le. “Koon jaake tchiddo hi, stell buder gar pre.”

¹⁰ Ninna miro latcheder maal, kowa, kai mantsa khetne chas, phukras ap mande.

¹¹ Tu, baro Dewel, kre tiro dji mange pre! Hade man pale pre! Palle dau len lauter pale, hoi jon mange kran.

¹² Muk len gar pral mande te sal! Palle dikau, te dikeh tu latches ap mande.

¹³ Me shunau ap tute miro tselo djijeha. Doleske rikreh tu miro djipen, un mukeh man te djiwell pash tute hako tsiro.

¹⁴ Sharas o baro Debles, ko Debles pral o Israel, kanna un hako tsiro. Amen! Awa, Amen!