Debleskri gili 34 - O Debleskro Drom 2021 (Sinte)

O Dewel rikrell peskre wasta pral peskre menshende

¹ I gili o Davidestar, hoi job giwas, har job pash o Abimelech kras, har te wals lo dinelo, un kowa les krik tradas.

² Me kamau o baro Debles te sharell hako tsireske, un kamau gar tele mukell, te parkrap man pash leste.

³ Kowa, hoi job lauter kras an miro djipen, kamau me te sharell. Mu shunenn kowa kolla, kai tele rikedo hi, un wenn bachtele!

⁴ Giwenn mantsa gilja o baro Debleske! Krenn leskro lab mantsa khetne baro!

⁵ Me rodom o baro Debles, un job shunas man. Job las man win dran miri tseli daar.

⁶ Kolla, kai ap leste dikenna, lengre jaka wenna har i momeli, un jon hunte ladjenn pen gar.

⁷ Ake hi jek, kai gole das ap o baro Debleste, har leske djungeles djas, un job shunas les un las les win dran lauter, hoi leske o djipen phares kras.

⁸ O baro Debleskro bolepaskro hi trul kolende, kai djiwenn o baro Debleha, un lell len win dran i bibacht.

⁹ Haiwenn un dikenn har kamles o baro Dewel hi! Bachtelo hi kowa, kai pes ap leste rikrella.

¹⁰ Tumer, kai o baro Debleskre menshe han, djiwenn leha! Kolen, kai djiwenn leha, hi lauter o djipaske.

¹¹ I bare diwje margodje hatsenn gar hako diwes doha chapaske un hunte bokenna. Kol menshen, kai rodenn o baro Debles, hi lauter doha djipaske.

¹² Awenn, tumer tchawe un shunenn, hoi me penau! Me kamau tumen te sikrell, har djiwenn tumer o baro Debleha.

¹³ Kamenn tumer te djiwenn i shukar un rah djipen?

¹⁴ Palle denn garda ap tumari tchip, te rakrell li kek tchilatchepen un kek chochepen!

¹⁵ Rikrenn tumen pale dran o tchilatchepen un krenn o latchepen! Tumari tseli sorjah krenn lauter, te well kek tchingepen mank tumende!

¹⁶ O baro Dewel dikell ap kolende, kai an o tchatchepen tardo hi. Un leskre kanda shunenn len, te denn le gole.

¹⁷ O baro Dewel hi gar kolentsa, kai o tchilatchepen krenna, un krell, te wenn le sik bistedo pal lengro merepen.

¹⁸ Te denn kolla ap leste gole, kai rikrenn ap leste, palle shunell len o baro Dewel, un lell len win dran lengri tseli bibacht.

¹⁹ O baro Dewel hi pash kolende, kai lengro dji phagedo hi. Un kolenge, kai dikenn buder kek momeli an pengro djipen, hi lo ap i rig tardo.

²⁰ Bud duka wenna ap koleste, kai an o tchatchepen tardo hi. Dran kowa lauter lell o baro Dewel les win.

²¹ Job dell jaake jak ap leste, te well kek kokalo lestar phagedo.

²² O tchilatcho merell dran peskro tchilatchepen. Un kolla, kai kamenn tchilatchepen ap i latchende te anell, lenna pengri phagi.

²³ O baro Dewel rikrell peskre budepangre ap o djipen. Un ap lauterende, kai rikrenn pen ap leste, well kek doosh anlo.