Debleskri gili 3 - O Debleskro Drom 2021 (Sinte)

Mo Dewel, ab ap miri rig!

¹ I gili o Davidestar, hoi lo kras an ko tsiro, har hunte nashas lo peske glan peskro tchaweste, o Absalom.

² Baro Dewel, dik, har bud hi kolla, kai ap mande djan! Dik, har bud hadenn pen ap mande!

³ Bud penenn mandar: “O Dewel hi gar ap leskri rig.”

⁴ Tu, baro Dewel, rike tiro wast pral mande! Tu hal kowa, kai miro shero pale hadell, te hunte ladjap man gar.

⁵ Dau me gole ap o baro Debleste, shunell lo man ap peskri berga, kai job djiwell.

⁶ Me tchiwom man tele un sowom, un djinom, har djangrom, o baro Dewel das jak ap mande i tseli rat.

⁷ Me darau gar deesh-serja lurdendar, kai djan ap mande hake rigjendar.

⁸ Ste pre, baro Dewel, un le man win, mo Dewel! Hakenes, kai ap mande djal, deh tu ap i tcham. Awa, i tchilatchenge deh tu i danda paash.

⁹ Baro Dewel, tu hal kowa, kai lell man win dran i bibacht. Te well tiri bacht ap tire menshende!