Debleskri gili 21 - O Debleskro Drom 2021 (Sinte)

O baro rai parkrell pes pash o baro Debleste

¹ I gili o rajeske pral i gipangre. O David kras kai gili.

² Baro Dewel, har bachtelo hi o baro rai pral tiri soor! Tu hal ap leskri rig. Doleske bashrell leskro dji.

³ Kowa, hoi job o djijestar kamas, dal tu les, un kowa, hoi job tutar mangas, rikral gar pale.

⁴ Tu tchoral pral leste bacht pral bacht, tchiwal shereskro sonakai ap leskro shero.

⁵ Djipen mangas lo tutar, un tu dal les leste: o djipen, hoi gar pre-herella, dal tu les.

⁶ Tu hal ap leskri rig un kral leskro railepen bares. Shukapen un barepen tchiwal tu ap leste.

⁷ Tiri bacht hi ap leste hako tsiro. Tu hal pash leste. Doleske bashrell leskro dji.

⁸ O baro rai patsell ap o baro Debleste, ko Debleste pral halauter. Un dran o Debleskro latchepen nai atchell o baro rai soreles tardo.

⁹ Tiro wast hatsell hakenes, kai kamell tuke tchilatchepen te krell. Tiro tchatcho wast hatsell kolen, kai pen ap tute choirenna.

¹⁰ Tu chatchreh len har an i bobeskri jag, an ko tsiro, kai tu mukeh tut te dikell. Tiri choli chatchrell har i jag, un chal len pre.

¹¹ Kek lengre tchawendar atchenn djido, gar jek lendar atchell ap kai phub.

¹² Jon wan khetne un rakran, har nai krenn le tuke tchilatchepen. Tchi, hoi kamenn le tuha te krell, djal lenge mishto.

¹³ Tu leh tiro bogo un rikreh ap lende, un kreh, te rissrenn le pen trujel un nashenn penge.

¹⁴ Baro Dewel, hade tut an tiri soor! Palle giwah tuke gilja un sharah tiri soor.