Debleskri gili 2 - O Debleskro Drom 2021 (Sinte)

O Debleskro tchawo hi o baro rai

¹ I menshe an i wawar themma hi diwjo. Hoi kamenn le? Jon hadenn pen pral o baro Debleste! Hoske? Hoi le krenn, hi tchitcheske!

² I bare raja ap kai phub stakrenna pre, un i pralstune beshenn khetne, un krenn win, har nai hadenn le pen pral o baro Debleste un pral koleste, kones job win rodas.

³ “Mer kamah buder gar te wenn le rai pral mende”, penenn le. “Witsras lengre shelle mendar, kolentsa jon men pandan!”

⁴ O Dewel, kai an o bolepen beshdo hi, sal pral lende un lengro dinelo rakepen.

⁵ Well i diwes, kai rakrell lo lentsa i choljah. Awa, leskri choljah krell lo lenge daar, te penell lo:

⁶ “Ap i berga Zion, kai mange hi, tchiwom me i baro rajes, koles me wi-rodom.”

⁷ Kau baro rai penell: “Mukenn man tumenge kowa te penell, hoi o baro Dewel kamell te krell. Job penas ap mande: ‘Miro tchawo hal tu. Kau diwes wom tiro dad.’

⁸ Te mangeh mandar i tsele themma, dau me len tute. Awa, i tseli phub dau me tute, te well li tiro.

⁹ Ab rai pral lende i sasterno wasteha, tu phageh len nai har tchare.”

¹⁰ Doleske awenn gar dinele, tumer bare raja ap kai phub! Shunenn mishto ap kowa, hoi penau, tumer, kai han tchatchepangre raja ap kai phub!

¹¹ Budrenn o baro Debleske un darenn lestar, perenn glan leste tele un tchumrenn leskre pire!

¹² Tchumrenn o tchawes, te well lo gar chojedo ap tumende, un tumer ap o drom merenna. Leskri choli nai chatchella sik. Bachtele hi kolla lauter, kai khatrenn pen pash leste.