Debleskri gili 19 - O Debleskro Drom 2021 (Sinte)

Lauter, hoi o baro Dewel kras un penas, hi shukar

¹ I gili o rajeske pral i gipangre. O David kras kai gili.

² O bolepen sikrella, har baro un railo o Dewel hi, un i bolepangre momlia sikrenna, hoi job lauter kras.

³ Jek diwes penell les o wawareske un jek rat i wawarake.

⁴ Kek labentsa rakrenn le. Un lengri gole well gar shunlo.

⁵ Lengro rakepen djal an hako them, un well shunlo ap i tseli phub. O Dewel kras i kheer o khameske an o bolepen.

⁶ Taissarlake djal o kham win har i bijabeskro dran peskri isema, un har i sorelo naashepaskro hi lo bachtelo, te nashell peskro drom.

⁷ O kham djal pre ap koi jek rig o bolepastar, un nashell peskro drom bis ap i wawar rig, un glan leskro tatepen atchella tchi khatedo.

⁸ O baro Debleskre laba hi lauter tchatcho un krenn mare djia sorelo. O baro Debleskro rakepen hi latcho, un krell i dinelen gosewo.

⁹ Kowa, hoi o baro Dewel menge penell, te kras mer, hi tchatcho, un krell maro dji bachtelo. Kowa, hoi lo mendar kamell, nai haiwell hakeno. Kowa hi har i momeli, hoi sikrell men o drom.

¹⁰ Te hadau o baro Debles pre, hi kowa mishto. Hako tsiro well lo hadedo. O tchatchepen, hoi o baro Dewel win rakrella, hi lauter latcho un tchatcho.

¹¹ Leskro tchatchepen hi kutcheder har o sonakai, har o raileder sonakai, un gudleder har o gwin, har o djudjeder gwin.

¹² Miro rai, me mukau tire laba ap miro dji te rakrell. Koon rikrell pes ap lende, koleske djal mishto.

¹³ Kek mendar djinell haki doosh, hoi lo ap peste anas. Le koi doosh mandar krik, hoi anom ap mande un djinau kowa gar!

¹⁴ Muk man gar khetne kolentsa te djal, kai hi pre-phurde, te tserdenn le man gar ap lengri rig. Jaake well kek doosh ap mande, un me krau kek baro tchilatcho koowa.

¹⁵ Muk o rakepen, hoi well dran miro mui, un kowa, hoi rakrau an miro dji, shukar te well tuke! Baro Dewel, tu rikreh man, un hal kowa, kai man win las dran o tchilatchepen.