Debleskri gili 17 - O Debleskro Drom 2021 (Sinte)

Baro Dewel, de man miro tchatchepen!

1 I mangepen o Davidestar.

¹ I mangepen o Davidestar. Baro Dewel, shun, hoi tutar mangau: De man miro tchatchepen! De jak, har dau ap tute gole! Shun miro mangepen, hoi well dran i mui, hoi gar chochella!

² Rake tu mange latches! Tu dikeh, ap hawi rig o tchatchepen hi.

³ Tu djineh, hoi mange an o shero djal. Ninna an i rati dikal palla, har an miro dji wi-dikella, un hatsal tchi an mande, hoi gar mishto hi. Ninna kek tchilatcho lab was dran miro mui win.

⁴ Jaake har i menshe krenna, krau me les gar. Me rikrau man ap tire laba, un djau gar ap tchilatche dromma.

⁵ Mire pire djan ap tiro drom un peran gar tele.

⁶ Me dau ap tute gole, un tu, mo Dewel shuneh man. Risse tiro kand pash mande, un shun, hoi me ap tute rakrau!

⁷ Sike tiro latchepen, tu, kai leh kolen dran i tchilatche wasta win, kai pen pash tute khatrenna,

⁸ Rike tiro wast pral mande, jaake har te woms tiri jak. Khate man jaake har i tchirklo peskre tchawen tel peskre mussja khatrell!

⁹ Tu dikeh kol tchilatchen, kai i sorjah ap mande pre djan, kolla, kai haki rigjatar ap mande wenna, te denn le man.

¹⁰ Lengre djia pandenn le, te khaitell len kek, un pengro mujeha krenn le pen bares.

¹¹ Kai mer ninna djah, jon hi trul mende un lenn men an i jak, te stakrenn le men an i phub.

¹² Jon hi har i lewo, hoi khatedes beshdo hi, un ap jekeste lurella, hoi job nai chal.

¹³ Baro Dewel, ste tu pre, tchip tut lenge an o drom! Stake len khetne! Ab un le tiro charo, un le miro djipen win dran i wasta kol tchilatchendar.

¹⁴ Baro Dewel, tiro wasteha le man win dran o wast kol menshendar, kai djiwenn i phubjake. Lengro brawlepen lenn jon an kau djipen! Tu kreh lengro per pherdo ko koowa, hoi tu lenge deh. Ninna lengre tchawe wenn tchalo, un mukenn pral pengre tchawenge.

¹⁵ Me krom, hoi tchatcho hi. Doleske nai dikau tut. Te djangrau pre, dikau me tut un hom tchalo i bachtjatar.