Debleskri gili 16 - O Debleskro Drom 2021 (Sinte)

O Dewel hi miro brawlepen un miri bacht

1 I gili o Davidestar.

¹ I gili o Davidestar. Rike tiro wast pral mande, miro Dewel! Me tchiwau miro tselo patsepen ap tute.

² Me penom ap o baro Debleste: Tu hal miro rai. Hako latcho koowa, hoi man hi, well tutar.

³ I Debleskre menshe an o them hi railo. Jon krenn miro dji bachteles.

⁴ Bud hi i duka kolendar, kai nashenn i wawar debleske palla. Me kamau kol chochene deblenge kek rat win te tchorell. Witar gar kamau lengro lab an miro mui te lell.

⁵ Tu, baro Dewel, hal miro brawlepen, un deh man lauter, hoi man hunte well djipaske. Miro tselo djipen hi an tiro wast.

⁶ Kowa, hoi job mange wi-rodas, hi an i shukar them. Awa, kowa, hoi job man dell, hi shukar.

⁷ Me sharau o baro Debles, kai mange penell, hoi hunte krap. Ninna an i rat rakrell miro dji mantsa, te bistrap gar, hoi job kamella.

⁸ Miro baro Dewel hi man hako tsiro glan mire jaka. Job te hi ap miri tchatchi rig, nai hom me soreles tardo.

⁹ Doleske hi miro dji bachtelo, un halauter an mande stell i bachtjatar. Awa, me nai tchiwau man tele kek darjah.

¹⁰ Tu mukeh man gar an o merepen, un kameh gar, te merell miro mass tele an i phub.

¹¹ Tu sikreh o drom, kai an o djipen anell. Pash tute hom bachtelo. Te hom kote, kai tu hal, bashrell miro dji hako tsiro.