Debleskri gili 146 - O Debleskro Drom 2021 (Sinte)

O Dewel rikrell hako tsiro pash peskre menshende

¹ Halleluja! Miro dji sharell o baro Debles.

² Jaake rah har me djiwau, kamau o baro Debles te sharell. Jaake rah har hom ap kai phub, kamau leske te bashrell.

³ Rikrenn tumen gar ap tumare pralstunende! Menshe hi le un nai lenn tumen gar win dran i bibacht.

⁴ O menshengro djipen atchell gar. Un job well pale tchik i phubjatar. Ko diwes, kai merell lo, djala lauter nashedo, hoi job peske glan las.

⁵ Bachtelo hi kowa, koleske o Jakobeskro Dewel ap i rig well, awa, kowa hi bachtelo, kai kokres ap peskro baro Debleste dikell.

⁶ Job hi o Dewel, kai o bolepen un i phub kras, un o baro pani, un kowa, hoi dren hi. Job hi kowa, kai hako tsiro peskro lab rikrell,

⁷ un kolen pengro tchatchepen dell, kai tele rikedo wenn. Kolen, kai bokenn, dell lo te chal. O baro Dewel hi kowa, kai i stilde win lell dran o stilepen.

⁸ O baro Dewel krell, te nai dikenn i korele pale. O baro Dewel hadell kolen pale pre, kai tele dino hi. O baro Dewel kamell kolen o djijestar, kai an o tchatchepen tardo hi.

⁹ O baro Dewel dell ap i wi-themarja jak, un hi ap i rig kol tchawendar, kolen kek dad buder hi, un ap i rig kol djuwjendar, kolengro rom meras. I tchilatchenge tchiwell lo barra an lengro drom.

¹⁰ O baro Dewel hi o baro rai hako tsireske. Job hi tiro Dewel, Zion, kanna un hako tsiro. Sharedo well o baro Dewel!